ന്യൂദല്‍ഹി: കേരളത്തിലെ കോണ്‍ഗ്രസിലും യു.ഡി.എഫിലും രൂപപ്പെട്ട ഭിന്നത ദേശീയ നേതൃത്വത്തിന്റെ പരിഗണനയിലേക്ക്. മുഖ്യമന്ത്രി വി.ഡി. സതീശന്‍ മുന്നണിയുമായി കൂടിയാലോചന നടത്താതെ തീരുമാനങ്ങളെടുക്കുന്നുവെന്ന ആരോപണം ഉന്നയിച്ച യു.ഡി.എഫ് കണ്‍വീനര്‍ അടൂര്‍ പ്രകാശ് കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗെയ്ക്ക് രേഖാമൂലം പരാതി നല്‍കി. രാഹുല്‍ ഗാന്ധിയെയും കണ്ട് വിഷയങ്ങള്‍ ഉന്നയിക്കാനാണ് അദ്ദേഹത്തിന്റെ ശ്രമം.
യു.ഡി.എഫ് കണ്‍വീനര്‍ എന്ന പദവിക്ക് അര്‍ഹമായ പരിഗണന ലഭിക്കുന്നില്ലെന്നും സര്‍ക്കാര്‍ തീരുമാനങ്ങള്‍ പലതും മാധ്യമങ്ങളിലൂടെയാണ് അറിയുന്നതെന്നും അടൂര്‍ പ്രകാശ് നേരത്തെ ആരോപിച്ചിരുന്നു. ജൂലൈ 30ന് ശേഷം യു.ഡി.എഫ് ഏകോപന സമിതി യോഗം ചേര്‍ന്നിട്ടില്ലെന്നതും അദ്ദേഹത്തിന്റെ ആരോപണത്തിന് പശ്ചാത്തലമായി. ഈ കാലയളവില്‍ നിരവധി കാബിനറ്റ് റാങ്ക് നിയമനങ്ങളും മറ്റ് പ്രധാന തീരുമാനങ്ങളും സര്‍ക്കാര്‍ കൈക്കൊണ്ടിരുന്നു.
മുസ്‌ലിം ലീഗ് നേതാവ് എം.കെ. മുനീറിനെ അഡ്മിനിസ്‌ട്രേറ്റീവ് റിഫോംസ് കമ്മീഷന്‍ ചെയര്‍മാനായും ഫോര്‍വേഡ് ബ്ലോക്ക് നേതാവ് ജി. ദേവരാജനെ ഡല്‍ഹിയിലെ സര്‍ക്കാര്‍ പ്രതിനിധിയായും നിയമിച്ച നടപടികള്‍ മുന്നണിയില്‍ ചര്‍ച്ച ചെയ്തില്ലെന്നാണ് അടൂര്‍ പ്രകാശിന്റെ പ്രധാന പരാതികളിലൊന്ന്.
അടൂര്‍ പ്രകാശിന്റെ പരാതിക്ക് പിന്നാലെ കെ.പി.സി.സി പ്രസിഡന്റ് സണ്ണി ജോസഫും ദല്‍ഹിയിലെത്തി. കേരളത്തിലെ സാഹചര്യം ദേശീയ നേതൃത്വത്തെ അദ്ദേഹം ധരിപ്പിച്ചിട്ടുണ്ട്. എന്നാല്‍ മുഖ്യമന്ത്രി ഏകപക്ഷീയമായി തീരുമാനങ്ങളെടുക്കുന്നുവെന്ന നിലപാട് തനിക്കില്ലെന്നും പരസ്യപ്രസ്താവനകള്‍ ഒഴിവാക്കുന്നതാണ് ഉചിതമെന്നും സണ്ണി ജോസഫ് വ്യക്തമാക്കി.
അടൂര്‍ പ്രകാശിനെ പിന്തുണച്ചതിന്റെ പേരില്‍ സൈബര്‍ ആക്രമണം നേരിടുന്നുവെന്ന് മഹിളാ കോണ്‍ഗ്രസ് സംസ്ഥാന അധ്യക്ഷ ജെബി മേത്തര്‍ ആരോപിച്ചു. സംഭവത്തില്‍ ആഭ്യന്തരമന്ത്രിക്കും ഡി.ജി.പിക്കും പരാതി നല്‍കിയതായും അവര്‍ പറഞ്ഞു. വിഷയം അടിയന്തരമായി ചര്‍ച്ച ചെയ്യാന്‍ കെ.പി.സി.സി എക്‌സിക്യൂട്ടീവ് യോഗം വിളിക്കണമെന്നും മഹിളാ കോണ്‍ഗ്രസ് നേതൃത്വം ആവശ്യപ്പെട്ടിട്ടുണ്ട്.
കേരളത്തിലെ നേതാക്കള്‍ക്കിടയിലെ ഭിന്നതയില്‍ ദേശീയ നേതൃത്വം അതൃപ്തിയിലാണെന്നാണ് റിപ്പോര്‍ട്ടുകള്‍. പ്രശ്‌നപരിഹാരത്തിനായി കേരളത്തിന്റെ ചുമതലയുള്ള എ.ഐ.സി.സി ജനറല്‍ സെക്രട്ടറി ദീപ ദാസ് മുന്‍ഷിയുടെ ഇടപെടലും പരിഗണനയിലുണ്ട്. മുഖ്യമന്ത്രി വി.ഡി. സതീശനും ദല്‍ഹിയിലെത്തുന്ന സാഹചര്യത്തില്‍ വിഷയത്തില്‍ ദേശീയ നേതൃത്വത്തിന്റെ ഇടപെടല്‍ കൂടുതല്‍ സജീവമാകാനാണ് സാധ്യത.
ഭരണത്തിലേറി ആറുമാസം തികയും മുമ്പ് കോണ്‍ഗ്രസിലെ അഭിപ്രായഭിന്നത പരസ്യമായത് യു.ഡി.എഫിന് രാഷ്ട്രീയമായി പുതിയ വെല്ലുവിളിയാണ്. അടൂര്‍ പ്രകാശിന്റെ പരാതി എങ്ങനെ പരിഹരിക്കപ്പെടും, സര്‍ക്കാര്‍-പാര്‍ട്ടി-മുന്നണി ഏകോപനത്തിന് ഹൈക്കമാന്‍ഡ് എന്ത് സംവിധാനം കൊണ്ടുവരും എന്നതാകും ഇനി നിര്‍ണായകം.
Related News
