അമ്മാന്‍: ജോര്‍ദാനിലെ കറാക്ക് ഗവര്‍ണറേറ്റിലുള്ള ഹമ്മൂദ് ക്രിസ്ത്യന്‍ പള്ളിയില്‍ സംസ്‌കാര ചടങ്ങിനിടെ അജ്ഞാത അക്രമികള്‍ നടത്തിയ വെടിവെയ്പ്പില്‍ ആറുപേര്‍ കൊല്ലപ്പെടുകയും 28 പേര്‍ക്ക് പരിക്കേല്‍ക്കുകയും ചെയ്തു. പരിക്കേറ്റവരില്‍ ചിലരുടെ നില ഗുരുതരമാണ്.
വെടിവെയ്പ്പ് നടക്കുന്ന സമയത്ത് പള്ളിക്കുള്ളിലും പരിസരത്തുമായി 150-നും 200-നും ഇടയില്‍ ആളുകള്‍ ഉണ്ടായിരുന്നുവെന്ന് ദൃക്‌സാക്ഷികള്‍ വ്യക്തമാക്കി. കൊല്ലപ്പെട്ടവരില്‍ ഭൂരിഭാഗം പേരുടെയും പ്രായം 50-നും 70-നും ഇടയിലാണ്. അക്രമികളെ പിടികൂടാനായി സുരക്ഷാ സേന പള്ളിയും പരിസരവും വളഞ്ഞ് തിരച്ചില്‍ ശക്തമാക്കിയിട്ടുണ്ട്.
സംഭവത്തെ ശക്തമായി അപലപിച്ച ജോര്‍ദാന്‍ രാജാവ് അബ്ദുല്ല രണ്ടാമന്‍, രാജ്യത്തിന്റെ ഐക്യം തകര്‍ക്കാന്‍ ശ്രമിക്കുന്നവര്‍ക്ക് 'ഏറ്റവും കടുത്ത തിരിച്ചടി' നല്‍കുമെന്ന് മുന്നറിയിപ്പ് നല്‍കി. പ്രധാനമന്ത്രി ജാഫര്‍ ഹസ്സന്റെ നേതൃത്വത്തില്‍ കറാക്കില്‍ സുരക്ഷാ കൗണ്‍സില്‍ അടിയന്തര യോഗം ചേര്‍ന്ന് സ്ഥിതിഗതികള്‍ വിലയിരുത്തി. മുസ്ലീം ഭൂരിപക്ഷ രാജ്യമാണെങ്കിലും, ഗണ്യമായൊരു ക്രിസ്ത്യന്‍ സമൂഹം തിങ്ങിപ്പാര്‍ക്കുന്ന പ്രദേശമാണ് കറാക്ക് ഗവര്‍ണറേറ്റ്.
Related News
