റിയാദ്: സൗദി അറേബ്യന്‍ തലസ്ഥാനമായ റിയാദിന് നേരെ ഹൂതികള്‍ വിക്ഷേപിച്ച ബാലിസ്റ്റിക് മിസൈല്‍ വ്യോമപ്രതിരോധ സംവിധാനങ്ങള്‍ തകര്‍ത്തതായി സൗദിയുടെ നേതൃത്വത്തിലുള്ള സഖ്യസേന അറിയിച്ചു.
സഖ്യസേനാ വക്താവ് സാമൂഹികമാധ്യമമായ എക്‌സിലൂടെയാണ് വിവരം പുറത്തുവിട്ടത്. മിസൈല്‍ ഭീഷണിയെത്തുടര്‍ന്ന് റിയാദ്, നജ്‌റാന്‍, വാദി അല്‍ദവാസിര്‍ മേഖലകളില്‍ സൗദി സിവില്‍ ഡിഫന്‍സ് അടിയന്തര മുന്നറിയിപ്പുകള്‍ നല്‍കിയിരുന്നു. പിന്നീട് മൂന്നിടങ്ങളിലും ഭീഷണി ഒഴിഞ്ഞതായി അധികൃതര്‍ അറിയിച്ചു.
സൗദി അറേബ്യയുടെ കിഴക്കന്‍ പ്രവിശ്യയില്‍ ഡ്രോണ്‍ തകര്‍ത്തതായും സഖ്യസേന വ്യക്തമാക്കിയിരുന്നു.
റിയാദിനും ഖമീസ് മുശൈത്തിനും നേരെയാണ് ഹൂതി ബാലിസ്റ്റിക് മിസൈല്‍ ആക്രമണമുണ്ടായത്. തെക്കന്‍ മേഖലയിലേക്ക് നീങ്ങിയ രണ്ട് ഡ്രോണുകളും തകര്‍ത്തതായി സഖ്യസേന വ്യക്തമാക്കി.
യെമന്റെ സുരക്ഷയ്ക്കും സ്ഥിരതയ്ക്കുമുള്ള പ്രതിബദ്ധത സൗദി അറേബ്യ തുടരുമെന്നും ഇരു രാജ്യങ്ങളിലെയും ജനങ്ങള്‍ തമ്മിലുള്ള ചരിത്രപരവും സാഹോദര്യപരവുമായ ബന്ധം സംരക്ഷിക്കുമെന്നും പ്രസ്താവനയില്‍ വ്യക്തമാക്കി.
ഇരു രാജ്യങ്ങളുടെയും താല്‍പര്യങ്ങള്‍ സംരക്ഷിക്കുക, മേഖലയില്‍ സുരക്ഷയും സ്ഥിരതയും ശക്തിപ്പെടുത്തുക, യെമനിലെ ഗോത്രവിഭാഗങ്ങളെ അവരുടെ താല്‍പര്യങ്ങള്‍ക്ക് വിരുദ്ധമായ സംഘര്‍ഷങ്ങളില്‍ ഉപയോഗിക്കുന്നത് തടയുക എന്നിവയാണ് സൗദിയുടെ ലക്ഷ്യമെന്നും സഖ്യസേന അറിയിച്ചു. സുരക്ഷ, സമാധാനം, വികസനം എന്നിവയാണ് യെമന്‍ ജനതയുടെ ആഗ്രഹങ്ങളെന്നും പ്രസ്താവന ചൂണ്ടിക്കാട്ടി.
Related News
