ന്യൂദല്‍ഹി- സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും വോട്ടര്‍പട്ടികയുടെ പ്രത്യേക തീവ്ര പരിഷ്‌കരണവുമായി ബന്ധപ്പെട്ട ക്രമക്കേടുകളില്‍ പ്രതിഷേധിച്ച് ചീഫ് ഇലക്ഷന്‍ കമ്മിഷണര്‍ ഗ്യാനേഷ് കുമാറിന്റെ രാജി ആവശ്യപ്പെട്ടുള്ള പ്രതിപക്ഷ പ്രതിഷേധത്തിന് പിന്തുണയുമായി ബിജു ജനതാദള്‍. ബി.ജെ.ഡി അധ്യക്ഷന്‍ നവീന്‍ പട്‌നായിക്കിന്റെ നിര്‍ദ്ദേശപ്രകാരം രാജ്യസഭാ എം.പിമാരായ മാനസ് മംഗരാജ്, സുലതാ ദിയോ എന്നിവരാണ് ദല്‍ഹിയില്‍ നടക്കുന്ന പ്രതിപക്ഷ പ്രതിഷേധത്തില്‍ പങ്കെടുത്തത്.

ചൊവ്വാഴ്ച ദല്‍ഹിയുടെ കേന്ദ്രഭാഗങ്ങളില്‍ ഇന്ത്യാ സഖ്യത്തിന്റെ നേതൃത്വത്തില്‍ വന്‍ പ്രതിഷേധ മാര്‍ച്ചാണ് നടന്നത്. ലോക്സഭാ പ്രതിപക്ഷ നേതാവ് രാഹുല്‍ ഗാന്ധിയും പ്രിയങ്ക ഗാന്ധിയും നയിച്ച മാര്‍ച്ചില്‍ പങ്കെടുത്ത നേതാക്കളെ പോലീസ് തടയുകയും താല്‍ക്കാലികമായി കസ്റ്റഡിയിലെടുത്ത് പിന്നീട് വിട്ടയക്കുകയും ചെയ്തിരുന്നു. 13 കോടിയിലധികം വോട്ടര്‍മാരുടെ പേരുകള്‍ നീക്കം ചെയ്തതിലും ഏകപക്ഷീയമായ തീരുമാനങ്ങളിലുമുള്ള വന്‍ പ്രതിഷേധമാണ് ഇപ്പോള്‍ തെരുവില്‍ അരങ്ങേറുന്നത്.

2024-ലെ ഒഡീഷ നിയമസഭാ തിരഞ്ഞെടുപ്പില്‍ ബി.ജെ.ഡി ഭരണത്തില്‍ നിന്ന് പുറത്താകുകയും ബി.ജെ.പി അധികാരത്തില്‍ എത്തുകയും ചെയ്തതോടെ ഇരു പാര്‍ട്ടികളും തമ്മിലുള്ള ബന്ധം വന്‍ ഉലച്ചിലിലാണ്. മുന്‍കാലങ്ങളില്‍ ബി.ജെ.പി നയിക്കുന്ന എന്‍.ഡി.എ മുന്നണിയുടെ ഭാഗമായിരുന്ന (1998-2009) ബി.ജെ.ഡി, ഇപ്പോള്‍ ദേശീയതലത്തില്‍ ബി.ജെ.പിക്കും കേന്ദ്ര സര്‍ക്കാരിനുമെതിരെ പ്രതിപക്ഷ പാര്‍ട്ടികളുമായി ഒന്നിക്കുന്നത് വലിയ രാഷ്ട്രീയ മാറ്റമായാണ് വിലയിരുത്തപ്പെടുന്നത്.

തെരഞ്ഞെടുപ്പ് കമ്മിഷന്‍ നടത്തിവരുന്ന വോട്ടര്‍പട്ടിക പുതുക്കലിലെ അപാകതകളെക്കുറിച്ച് ദി ഇന്ത്യന്‍ എക്‌സ്പ്രസ് കഴിഞ്ഞ മാസം പുറത്തുവിട്ട റിപ്പോര്‍ട്ടിന് പിന്നാലെയാണ് പ്രതിപക്ഷം സമരം ശക്തമാക്കിയത്. വോട്ടര്‍പട്ടിക സുതാര്യമാക്കണമെന്നും ഗ്യാനേഷ് കുമാര്‍ അടിയന്തരമായി രാജിവയ്ക്കണമെന്നുമാണ് ബി.ജെ.ഡിയും ഇന്ത്യാ സഖ്യവും ഒരേസ്വരം ഉയര്‍ത്തി ആവശ്യപ്പെടുന്നത്.