വാഷിങ്ടണ്‍: നൊബേല്‍ സമാധാന സമ്മാനം പ്രഖ്യാപിക്കാന്‍ ദിവസങ്ങള്‍ മാത്രം ശേഷിക്കെ അദമ്യമായ അഭിലാഷം വീണ്ടും പരസ്യമായി പ്രകടിപ്പിച്ച അമേരിക്കന്‍ പ്രസിഡന്റ് ഡോണള്‍ഡ് ട്രംപ്. താന്‍ എട്ട് യുദ്ധങ്ങള്‍ അവസാനിപ്പിച്ചുവെന്നത് വെറും വീരവാദമല്ലെന്നും അതിനാല്‍ നൊബേല്‍ സമാധാന സമ്മാനത്തിന് അര്‍ഹനാണെന്നും വീണ്ടും ട്രംപ് അവകാശപ്പെട്ടു. താന്‍ ചെയ്ത കാര്യങ്ങള്‍ വസ്തുതകളായി പറയുക മാത്രമാണെന്നും വൈറ്റ് ഹൗസില്‍ മാധ്യമപ്രവര്‍ത്തകരോട് ട്രംപ് പറഞ്ഞു.
മറ്റാരും ചെയ്യാത്ത കാര്യങ്ങളാണ് ഞാന്‍ ചെയ്തത്. ഞാന്‍ വീരവാദം പറയുകയല്ല, വസ്തുതകള്‍ പറയുകയാണ്. ഒരു പ്രസിഡന്റും ഇത്രയും യുദ്ധങ്ങള്‍ അവസാനിപ്പിച്ചിട്ടുണ്ടാകില്ല. ഞാന്‍ എട്ട് യുദ്ധങ്ങള്‍ അവസാനിപ്പിച്ചു, -ട്രംപ് പറഞ്ഞു. മറ്റൊരു സംഘര്‍ഷം കൂടി അവസാനിപ്പിക്കാനുള്ള സാധ്യതയുണ്ടെന്നും അദ്ദേഹം സൂചിപ്പിച്ചു.
ഇന്ത്യ-പാകിസ്താന്‍, ഇസ്രയേല്‍-ഇറാന്‍, കംബോഡിയ-തായ്‌ലന്‍ഡ്, സെര്‍ബിയ-കൊസോവോ, റുവാണ്ട-കോംഗോ, ഈജിപ്ത്-എത്യോപ്യ, അര്‍മീനിയ-അസര്‍ബൈജാന്‍ തുടങ്ങിയ സംഘര്‍ഷങ്ങളിലാണ് അമേരിക്കയുടെ ഇടപെടലിലൂടെ സമാധാനം സാധ്യമായതെന്നാണ് ട്രംപിന്റെ അവകാശവാദം. എന്നാല്‍ ഇവയില്‍ പലതും ഔദ്യോഗികമായി യുദ്ധങ്ങളായിരുന്നില്ല. ഇന്ത്യയുള്‍പ്പെടെ പല രാജ്യങ്ങളും ട്രംപിന്റെ ഇടപെടല്‍ നിഷേധിക്കുകയാണ്. ഓപ്പറേഷന്‍ സിന്ദൂറിനിടെ അമേരിക്കന്‍ ഇടപെടല്‍ ഉണ്ടായിരുന്നില്ലെന്നും സൈനിക നടപടി അവസാനിപ്പിക്കാനുള്ള ധാരണ ഇന്ത്യയും പാകിസ്താനും നേരിട്ടാണ് കൈവരിച്ചതെന്നും വിദേശകാര്യ മന്ത്രാലയം വ്യക്തമാക്കിയിരുന്നു. എന്നാല്‍ ധാരണ ആദ്യം പുറത്തുവിട്ടത് അമേരിക്കയായിരുന്നു.
ട്രംപിന്റെ നൊബേല്‍ അവകാശവാദം പുതിയതല്ല. ആദ്യ പ്രസിഡന്‍ഷ്യല്‍ കാലത്തുതന്നെ ഉത്തരകൊറിയയുമായുള്ള നയതന്ത്ര ശ്രമങ്ങള്‍ ചൂണ്ടിക്കാട്ടി അദ്ദേഹം പുരസ്‌കാരത്തിനുള്ള അര്‍ഹത അവകാശപ്പെട്ടിരുന്നു. 2018ല്‍ ഉത്തരകൊറിയന്‍ നേതാവ് കിം ജോങ് ഉന്നുമായുള്ള കൂടിക്കാഴ്ചയ്ക്കുശേഷം നോര്‍വേയിലെ രണ്ട് രാഷ്ട്രീയ നേതാക്കള്‍ അദ്ദേഹത്തെ നൊബേലിന് നാമനിര്‍ദേശം ചെയ്തതായും റിപ്പോര്‍ട്ടുകളുണ്ടായിരുന്നു.
2025 ഫെബ്രുവരിയില്‍ ഇസ്രയേല്‍ പ്രധാനമന്ത്രി ബെഞ്ചമിന്‍ നെതന്യാഹുവുമായുള്ള കൂടിക്കാഴ്ചയ്ക്കിടെയും ട്രംപ് നൊബേല്‍ ലഭിക്കാത്തതിലുള്ള നിരാശ പ്രകടിപ്പിച്ചിരുന്നു. എനിക്ക് നാലോ അഞ്ചോ തവണ നൊബേല്‍ ലഭിക്കേണ്ടതായിരുന്നു എന്നായിരുന്നു 2025 ജൂണിലെ അദ്ദേഹത്തിന്റെ മറ്റൊരു അവകാശവാദം.
ഇസ്രയേലും ചില അറബ് രാജ്യങ്ങളും തമ്മിലുള്ള ബന്ധം സാധാരണ നിലയിലാക്കാന്‍ സഹായിച്ച അബ്രഹാം കരാറുകളും നൊബേലിനുള്ള തന്റെ അര്‍ഹതയുടെ തെളിവായി ട്രംപ് ഉയര്‍ത്തിക്കാട്ടുന്നു.
ട്രംപിന്റെ നൊബേല്‍ പ്രചാരണത്തിന് ചില വിദേശ നേതാക്കളുടെയും അമേരിക്കന്‍ റിപ്പബ്ലിക്കന്‍ നേതാക്കളുടെയും പിന്തുണ ലഭിച്ചിട്ടുണ്ട്. 2026 ജനുവരിയില്‍ റിപ്പബ്ലിക്കന്‍ പ്രതിനിധി ക്ലോഡിയ ടെന്നി മൂന്നാം തവണ ട്രംപിനെ നൊബേലിന് നാമനിര്‍ദേശം ചെയ്തതായി അറിയിച്ചു. ഇസ്രയേല്‍, പാകിസ്താന്‍, കംബോഡിയ എന്നിവിടങ്ങളിലെ നേതാക്കളും ട്രംപിനെ 2026ലെ സമാധാന സമ്മാനത്തിനായി നാമനിര്‍ദേശം ചെയ്തതായി റിപ്പോര്‍ട്ടുകളുണ്ട്.
എന്നാല്‍ ഒരാള്‍ നാമനിര്‍ദേശം ചെയ്യപ്പെട്ടു എന്നത് നൊബേല്‍ സമാധാനത്തിനുള്ള മാനദണ്ഡമല്ല. നോര്‍വീജിയന്‍ നൊബേല്‍ കമ്മിറ്റി വ്യക്തിഗത നാമനിര്‍ദേശങ്ങള്‍ ഔദ്യോഗികമായി സ്ഥിരീകരിക്കാറില്ല. 2026ലെ സമാധാന സമ്മാനത്തിനായി 287 സ്ഥാനാര്‍ഥികളാണ് പരിഗണനയിലുള്ളതെന്ന് കമ്മിറ്റി അറിയിച്ചിരുന്നു.
ഇറാനുമായുള്ള സംഘര്‍ഷവും ട്രംപിന്റെ നൊബേല്‍ അവകാശവാദത്തെ സങ്കീര്‍ണമാക്കുന്നുണ്ട്. ഒരു വശത്ത് സ്വയം സമാധാനസ്ഥാപകനായി അവതരിപ്പിക്കുമ്പോള്‍ മറുവശത്ത് ഇറാനുമായുള്ള കടുത്ത സംഘര്‍ഷം തുടരുന്നത് അദ്ദേഹത്തിന്റെ അവകാശവാദങ്ങള്‍ക്ക് രാഷ്ട്രീയമായും നയതന്ത്രപരമായും പുതിയ ചോദ്യങ്ങള്‍ ഉയര്‍ത്തുന്നു.