ജിദ്ദ: അറേബ്യന്‍ ഗള്‍ഫ് കപ്പ് കിരീടനേട്ടത്തിന് പിന്നാലെ ഫിഫ ലോക റാങ്കിംഗില്‍ സൗദി അറേബ്യക്ക് വന്‍ മുന്നേറ്റം. പുതിയ റാങ്കിംഗില്‍ മൂന്ന് സ്ഥാനങ്ങള്‍ മെച്ചപ്പെടുത്തി സൗദി 55-ാം സ്ഥാനത്തെത്തി. 2026 ലോകകപ്പിന് പിന്നാലെ 58-ാം സ്ഥാനത്തായിരുന്ന സൗദി അറേബ്യ, ചൊവ്വാഴ്ച ജിദ്ദയിലെ അല്‍-ഇന്‍മാ സ്റ്റേഡിയത്തില്‍ നടന്ന ഫൈനലില്‍ യുഎഇയെ 2-0ന് പരാജയപ്പെടുത്തിയതോടെയാണ് പുതിയ റാങ്കിംഗില്‍ മുന്നേറ്റം നടത്തിയത്. ഒരു അന്താരാഷ്ട്ര ഇടവേളയ്ക്ക് ശേഷമാണ് ഫിഫ പുതിയ റാങ്കിംഗ് പുറത്തിറക്കിയത്.

ജോര്‍ജിയോസ് ഡോണിസിന്റെ പരിശീലനത്തിന് കീഴിലുള്ള സൗദി ടീം ടൂര്‍ണമെന്റില്‍ തോല്‍വിയറിയാതെയാണ് കിരീടം സ്വന്തമാക്കിയത്. ഗള്‍ഫ് കപ്പിലെ അഞ്ച് മത്സരങ്ങളില്‍ നേടിയ പോയിന്റുകള്‍ ആദ്യമായി ഫിഫ റാങ്കിംഗിനായി കണക്കാക്കുകയും ചെയ്തു.

സൗദി ദേശീയ ടീമിന് 1,443.17 പോയിന്റാണ് ലഭിച്ചത്. ഇതോടെ അറബ് രാജ്യങ്ങളില്‍ റാങ്കിംഗില്‍ ഏറ്റവും മുന്നിലുള്ള നാലാമത്തെ ടീമെന്ന നേട്ടവും സൗദി സ്വന്തമാക്കി. മൊറോക്കോ, ഈജിപ്ത്, അള്‍ജീരിയ എന്നിവയാണ് സൗദിക്ക് മുന്നിലുള്ള അറബ് ടീമുകള്‍.

ലോക ചാമ്പ്യന്മാരായ സ്‌പെയിന്‍ തന്നെയാണ് ഫിഫ റാങ്കിംഗില്‍ ഒന്നാം സ്ഥാനത്ത്. അര്‍ജന്റീന, ഫ്രാന്‍സ്, ഇംഗ്ലണ്ട് എന്നിവയാണ് തൊട്ടുപിന്നില്‍. തുടര്‍ച്ചയായ നാല് യുവേഫ നേഷന്‍സ് ലീഗ് വിജയങ്ങളുടെ കരുത്തില്‍ പോര്‍ച്ചുഗല്‍ അഞ്ചാം സ്ഥാനത്തേക്ക് ഉയര്‍ന്നു. ബ്രസീല്‍ ആറാം സ്ഥാനത്തും മൊറോക്കോ ഏഴാം സ്ഥാനത്തുമാണ്.

മറ്റ് അറബ് ടീമുകളില്‍ ഈജിപ്ത് ഒരു സ്ഥാനം താഴേക്ക് നീങ്ങി 25-ാം സ്ഥാനത്തെത്തി. അള്‍ജീരിയ ഒരു സ്ഥാനം മുന്നേറി 28-ാം സ്ഥാനത്തും എത്തി.