കോഴിക്കോട്: പ്രേംനസീറിന്റെ മൂത്ത മകള്‍ ലൈലാബീഗം (76) കോഴിക്കോട് പറയഞ്ചേരിയിലെ വസതിയില്‍ നിര്യാതയായി. ചിറയിന്‍കീഴ് കൊടിക്കകം ഗവണ്‍മെന്റ എല്‍.പി. സ്‌കൂള്‍, മദ്രാസ് പ്രസിഡന്‍സി സ്‌കൂള്‍, തിരുവനന്തപുരം സെന്റ് റോക്‌സ് കോണ്‍വെന്റ്, കുന്തല്ലൂര്‍ ഗവണ്‍മെന്റ് ഹൈസ്‌കൂള്‍ എന്നിവിടങ്ങളില്‍ വിദ്യാഭ്യാസം. തിരുവനന്തപുരം മംഗലപുരത്തെ മജിസ്‌ട്രേട്ട് ഇബ്രാഹിംകുഞ്ഞ് സാഹിബിന്റെ മകന്‍ അബ്ദുല്‍ റഷീദായിരുന്നു ഭര്‍ത്താവ്. പൊതുമരാമത്ത് വകുപ്പില്‍ സൂപ്രണ്ടിംഗ് എഞ്ചിനിയര്‍ ആയിരുന്നു. ഏതാനും വര്‍ഷം മുന്‍പ് അദ്ദേഹവും മരണപ്പെട്ടു. സജിത്ത്, സോജ എന്നിവര്‍ മക്കളാണ്.
പ്രേംനസീറിന്റെ 60 വര്‍ഷം പഴക്കമുള്ള ചിറയിന്‍ കീഴിലെ വീടിന്റെ പേര് ഈ മകളുടെ പേരിനെ സൂചിപ്പിക്കുന്ന ലൈലാ കോട്ടേജ് എന്നാണ്.
പ്രേംനസീറിനെക്കുറിച്ച് ഇതിലെ പോയത് വസന്തം എന്നൊരു ഓര്‍മ പുസ്തകം ഇവര്‍ രചിച്ചിട്ടുണ്ട്. സഹോദരങ്ങള്‍: ഷാനവാസ്, റസിയ, റിത.
ഖബറടക്കം സ്വദേശമായ തിരുവനന്തപുരത്ത് നടക്കും.
Related News
