ജിദ്ദ: സന്തോഷ് ഖാന്‍ സംവിധാനം ചെയ്ത ജിദ്ദ മല്ലൂസിന്റെ ആദ്യ ഹ്രസ്വചിത്രം 'ദ സര്‍ക്കിള്‍' എന്ന ചിത്രത്തിന്റെ പോസ്റ്റര്‍, ടീസര്‍ റിലീസ് ചടങ്ങ് ജിദ്ദയില്‍ നടന്നു.
'ഇനി വരാന്‍ പോകുന്ന കാലം വലിയ സിനിമകളുടേതല്ല, മറിച്ച് ഷോര്‍ട്ട് ഫിലിമുകളുടേതാണ്,' 55 മില്യണിലധികം പേര്‍ കണ്ട 'ഇന്‍ എ ഹാര്‍ട്ട്ബീറ്റ്' ഉദാഹരണമായി ചൂണ്ടിക്കാട്ടി ബ്ലോഗറും എഴുത്തുകാരനും സാമൂഹിക പ്രവര്‍ത്തകനുമായ ബഷീര്‍ വള്ളിക്കുന്നും ലത്തീഫ് എന്‍ കണ്‍ഫര്‍ട്ട്‌സും സംയുക്തമായി 'ദ സര്‍ക്കിളി'ന്റെ പോസ്റ്റര്‍ പ്രകാശനം നിര്‍വഹിച്ചു.
ബോളാഗോളം സിനിമയുടെ സംവിധായകന്‍ ജുനൈസ് കാപ്പില്‍, മുജീബ് റീഗല്‍, ഗായകന്‍ മിര്‍സ ഷെറീഫ് എന്നിവര്‍ ചേര്‍ന്നാണ് ഹ്രസ്വചിത്രത്തിന്റെ ടീസര്‍ പുറത്തിറക്കിയത്. പ്രവാസലോകത്ത് ബിസിനസ് തകരുന്നതും ജോലി നഷ്ടപ്പെട്ട് ജീവിതം പ്രതിസന്ധിയിലാകുന്നതുമാണ് ചിത്രത്തിന്റെ പ്രമേയമെന്ന് അധ്യക്ഷ പ്രസംഗത്തില്‍ ലത്തീഫ് എന്‍ കണ്‍ഫര്‍ട്ട്‌സ് സൂചിപ്പിച്ചു.
ചിത്രീകരണത്തിനിടയിലെ രസകരമായ അനുഭവങ്ങളും നേരിട്ട പ്രയാസങ്ങളും അഭിനേതാക്കളായ ഡോക്ടര്‍ ഇന്ദു, നാസര്‍, വാസു ഹംദാന്‍, ഷാക്കിര്‍ ഹൊറൈസണ്‍, ഷബീബ്, ഫസലു, യൂസുഫ് കാപ്പ്, താഹിര്‍ സമാന്‍ എന്നിവരും, ക്യാമറയ്ക്ക് പിന്നിലെ സംഭവങ്ങള്‍ നൗഷാദ് ചാത്തല്ലൂര്‍, അദ്‌നു, ബിജു രാമന്തളി എന്നിവരും സദസ്സുമായി പങ്കുവെച്ചു.
മിര്‍സ ഷരീഫ്, ജാഫറലി പാലക്കോട്, സംവിധായകന്‍ ജുനൈസ് കാപ്പ്, മുജീബ് റീഗള്‍, എഴുത്തുകാരി റജിയ വീരാന്‍, മുസ്തഫ കിഴിശ്ശേരി എന്നിവര്‍ ചടങ്ങിന് ആശംസകള്‍ നേര്‍ന്നു. ഷമീം ടീച്ചര്‍ അവതാരകയായ പരിപാടിയില്‍ അയ്യൂബ് മാസ്റ്റര്‍ സ്വാഗതവും ബിജു രാമന്തളി നന്ദിയും പറഞ്ഞു.
