റിയാദ്- നാഷണൽ ഫാൽക്കൺ സെന്റർ ലേലത്തിന്റെ അഞ്ചാം രാത്രിയിൽ 2,21,000 റിയാലിന് വിറ്റുപോയ ഷഹീൻ പക്ഷിയുടെ കുഞ്ഞ് ഈ സീസണിലെ ഇതുവരെയുള്ള ഏറ്റവും ഉയർന്ന വില നേടി. ഫാൽക്കൺ പ്രേമികളുടെ വൻ പങ്കാളിത്തത്തോടെ നടക്കുന്ന ഈ ലേലം നവംബർ 30 വരെ തുടരും.

എംപ്റ്റി ക്വാർട്ടറിലെ അൽ-ഹിൽവ മേഖലയിൽ നിന്ന് പിടികൂടിയ ഈ പക്ഷിക്കായി മൂന്ന് ഫാൽക്കൺ ഉടമകൾ തമ്മിൽ കടുത്ത മത്സരമാണ് നടന്നത്. 60,000 റിയാലിൽ തുടങ്ങിയ ലേല വിളിയാണ് പിന്നീട് റെക്കോർഡ് തുകയിലേക്ക് ഉയർന്നത്.

ദേശാടന പക്ഷികളായ ഷഹീൻ പക്ഷികളുടെ സംരക്ഷണവും ദേശീയ ഇനങ്ങളുടെ നിലനിൽപ്പും ലക്ഷ്യമിട്ടാണ് ഈ ലേലം സംഘടിപ്പിച്ചിരിക്കുന്നത്. ലേലത്തിലെ പ്രധാന ചടങ്ങുകൾ ടെലിവിഷൻ വഴിയും സോഷ്യൽ മീഡിയ പ്ലാറ്റ്ഫോമുകൾ വഴിയും തത്സമയം സംപ്രേക്ഷണം ചെയ്യുന്നുണ്ട്.

ഫാൽക്കൺ ഉടമകൾക്കായി പക്ഷികളെ സ്വീകരിക്കുക, താമസവും യാത്രാസൗകര്യവും ഒരുക്കുക, ലേലത്തിൽ നേരിട്ട് പ്രദർശിപ്പിക്കുക തുടങ്ങിയ സമഗ്രമായ സേവനങ്ങളാണ് നാഷണൽ ഫാൽക്കൺ സെന്റർ നൽകുന്നത്. ഈ പരമ്പരാഗത മേഖലയെ പരിപോഷിപ്പിക്കുന്നതിനും വളർത്തുന്നതിനും ഇത്തരം സൗകര്യങ്ങൾ ഏറെ സഹായിക്കുന്നുണ്ട്.