ന്യൂദല്‍ഹി- ലോക്‌സഭാ പ്രതിപക്ഷ നേതാവ് രാഹുല്‍ ഗാന്ധിയുടെ വിദേശ യാത്രയുമായി ബന്ധപ്പെട്ട് ബിജെപിയും കോണ്‍ഗ്രസും തമ്മില്‍ ശക്തമായ രാഷ്ട്രീയ പോര് ആരംഭിച്ചു. രാഹുല്‍ ഗാന്ധി വിമാനത്തിലിരിക്കുന്ന വീഡിയോ പങ്കുവെച്ചാണ് ബിജെപിയുടെ പരിഹാസം. കള്ളപ്രചാരണം നടത്തി ക്ഷീണിച്ചതിനാല്‍ രാഹുല്‍ ഗാന്ധി വിനോദസഞ്ചാരത്തിനായി വിയറ്റ്‌നാമിലേക്ക് പോയിരിക്കുകയാണെന്ന് ബിജെപി ആരോപിച്ചു. രാഷ്ട്രീയത്തില്‍ കഠിനാധ്വാനം ചെയ്യാന്‍ അദ്ദേഹത്തിന് കഴിയില്ലെന്നും കുറച്ചുദിവസത്തെ പ്രതിഷേധത്തിനുശേഷം അവധിക്കാലം ആഘോഷിക്കാന്‍ പോകുന്നത് പതിവാണെന്നും ബിജെപി വക്താക്കളായ ഷാസിയ ഇല്‍മിയും ആര്‍.പി. സിങ്ങും കുറ്റപ്പെടുത്തി. നുണകള്‍ പ്രചരിപ്പിച്ച് മടുത്തു ഇനി വിയറ്റ്‌നാമില്‍ കറങ്ങി വരാം എന്ന മട്ടിലാണ് അദ്ദേഹത്തിന്റെ യാത്രയെന്നും ബിജെപി എക്‌സ് ഹാന്‍ഡിലില്‍ കുറിച്ചു. ബിജെപിയുടെ ഈ ആരോപണങ്ങളെ കോണ്‍ഗ്രസ് നേതാവ് സന്ദീപ് ദീക്ഷിത് ശക്തമായി പ്രതിരോധിച്ചു. രാഹുല്‍ ഗാന്ധിയുടെ വ്യക്തിപരമായ യാത്രകളെ ബിജെപി അനാവശ്യമായി വിവാദമാക്കുകയാണെന്ന് അദ്ദേഹം വ്യക്തമാക്കി. പ്രതിപക്ഷ നേതാവ് എന്ന നിലയിലുള്ള ചുമതലകളുടെ ഭാഗമായി വിദേശ സര്‍വകലാശാലകളില്‍ വിദ്യാര്‍ത്ഥികളോടും ബുദ്ധിജീവികളോടും സംവദിക്കാനും പത്രസമ്മേളനങ്ങള്‍ നടത്താനുമാണ് അദ്ദേഹം പോകുന്നതെന്ന് കോണ്‍ഗ്രസ് വിശദീകരിച്ചു. പാര്‍ലമെന്റ് സമ്മേളന കാലയളവിലെങ്കിലും വിദേശയാത്ര ഒഴിവാക്കുകയെന്ന കീഴ് വഴക്കം പ്രധാനമന്ത്രി നരേന്ദ്ര മോദി തെറ്റിച്ചപ്പോള്‍ ബിജെപി എന്തുകൊണ്ട് പ്രതികരിച്ചില്ലെന്നും കോണ്‍ഗ്രസ് തിരിച്ചുചോദിച്ചു.
Related News
