റിയാദ്: സൗദി കിരീടാവകാശി മുഹമ്മദ് ബിന്‍ സല്‍മാന്‍ രാജകുമാരന്‍ ഫ്രഞ്ച് പ്രസിഡന്റ് ഇമ്മാനുവല്‍ മാക്രോണുമായി റിയാദില്‍ കൂടിക്കാഴ്ച നടത്തി. ഇരുരാജ്യങ്ങളും തമ്മിലുള്ള പങ്കാളിത്തത്തിന്റെ കരുത്ത് സാക്ഷ്യപ്പെടുത്തുന്നതായിരുന്നു കൂടിക്കാഴ്ചയെന്ന് ഫ്രഞ്ച് പ്രസിഡന്‍സി അറിയിച്ചു.
ഹ്രസ്വകാല, ഇടത്തരം, ദീര്‍ഘകാല അടിസ്ഥാനങ്ങളില്‍ രാജ്യങ്ങളുടെ വിതരണ ശൃംഖലകളുടെ സുരക്ഷ ഉറപ്പാക്കുന്ന പ്രധാന തീരുമാനങ്ങള്‍ കൂടിക്കാഴ്ചയില്‍ കൈക്കൊണ്ടതായി ഫ്രഞ്ച് പ്രസിഡന്‍സി വ്യക്തമാക്കി.
ഫ്രാന്‍സിന്റെ ഊര്‍ജ്ജ ആവശ്യങ്ങള്‍ പൂര്‍ണ്ണമായും നിറവേറ്റുന്നതിനായി മുമ്പ് അനുവദിച്ച അധിക ഡീസല്‍ വിതരണം, ആവശ്യമായ മാസങ്ങളിലേക്ക് കൂടി ദീര്‍ഘിപ്പിച്ചു നല്‍കാന്‍ സൗദി അധികൃതര്‍ സമ്മതിച്ചിട്ടുണ്ട്. യാമ്പുവിലെ സുപ്രധാന ഊര്‍ജ്ജ അടിസ്ഥാന സൗകര്യങ്ങള്‍ സംരക്ഷിക്കുന്നതിന് ഫ്രാന്‍സ് നല്‍കിയ സഹായത്തില്‍ സൗദി തൃപ്തി രേഖപ്പെടുത്തി. മേഖലയിലെ സുരക്ഷാ സഹകരണം കൂടുതല്‍ വിപുലീകരിക്കുന്നതിനായി ഉടന്‍ തന്നെ കൂടുതല്‍ ചര്‍ച്ചകള്‍ നടക്കും.
ഹോര്‍മുസ് കടലിടുക്കിലെ സുരക്ഷാ ഭീഷണികളും അപകടസാധ്യതകളും ലഘൂകരിക്കുന്നതിനായുള്ള അടിസ്ഥാന സൗകര്യ വികസന പദ്ധതികളുടെ നിര്‍വ്വഹണത്തില്‍ ഇരുരാജ്യങ്ങളും ഒന്നിച്ചു പ്രവര്‍ത്തിക്കുമെന്നും ഫ്രഞ്ച് പ്രസിഡന്‍സി കൂട്ടിച്ചേര്‍ത്തു.
Related News
