ന്യൂദല്‍ഹി- സ്റ്റേറ്റ് ബാങ്ക് ഓഫ് ഇന്ത്യക്ക് (എസ്.ബി.ഐ.) നേരെ വന്‍ സൈബര്‍ ആക്രമണം ഉണ്ടായതായി റിപ്പോര്‍ട്ട്. 3,897 ഉപഭോക്താക്കളുടെ വ്യക്തിഗത വിവരങ്ങള്‍ ചോരുകയും ഫോണ്‍ നമ്പറുകള്‍ അടക്കമുള്ള വിവരങ്ങള്‍ ഡാര്‍ക്ക് വെബില്‍ എത്തുകയും ചെയ്തതായി ബാങ്ക് സ്റ്റോക്ക് എക്‌സ്‌ചേഞ്ച് ഫയലിംഗിലൂടെ വ്യക്തമാക്കി.

ഡാര്‍ക്ക് വെബില്‍ ലഭ്യമായ ഏകദേശം 3,75,000 റെക്കോര്‍ഡുകള്‍ പ്രാഥമികമായി പരിശോധിച്ച് നടത്തിയ വിലയിരുത്തലിലാണ് എസ്.ബി.ഐ. ഉപഭോക്താക്കളുടെ വിവരങ്ങള്‍ തിരിച്ചറിഞ്ഞത്. ഉപഭോക്താക്കളുടെ പേരുകള്‍, മൊബൈല്‍ നമ്പറുകള്‍, ജനനത്തീയതികള്‍, ഇമെയില്‍ വിലാസങ്ങള്‍, താമസ വിലാസങ്ങള്‍ എന്നിവയ്ക്ക് പുറമെ ബ്രാന്‍ഡ് വിവരങ്ങള്‍, കസ്റ്റമര്‍ ഐ.ഡി, വായ്പാ രേഖകള്‍ എന്നിവയും ചോര്‍ന്നവയില്‍ ഉള്‍പ്പെടുന്നു.

ഒക്ടോബര്‍ 16-ന് ത്രെറ്റ് ഇന്റലിജന്‍സ് സര്‍വീസ് പ്രൊവൈഡര്‍, ഡിഫന്‍സ് സൈബര്‍ ഏജന്‍സി, സെര്‍ട്ട്-ഇന്‍ എന്നിവയില്‍ നിന്നാണ് ബാങ്കിന് ഇത് സംബന്ധിച്ച സുരക്ഷാ മുന്നറിയിപ്പ് ലഭിച്ചത്. ചോര്‍ച്ചയുടെ സ്വഭാവവും വ്യാപ്തിയും കൂടുതല്‍ വ്യക്തമായി പഠിക്കുന്നതിനായി ഒരു സ്വതന്ത്ര സൈബര്‍ സുരക്ഷാ ഏജന്‍സിയെ ചുമതലപ്പെടുത്തിയിട്ടുണ്ട്. അതേസമയം, ഈ സംഭവം ബാങ്കിന്റെ ദൈനംദിന പ്രവര്‍ത്തനങ്ങളെ ബാധിക്കില്ലെന്നാണ് എസ്.ബി.ഐയുടെ വിലയിരുത്തല്‍. രാജ്യത്തെ സാമ്പത്തിക സ്ഥാപനങ്ങള്‍ നേരിടുന്ന സൈബര്‍ ഭീഷണികള്‍ വര്‍ധിച്ചുവരുന്ന സാഹചര്യത്തിലാണ് രാജ്യത്തെ ഏറ്റവും വലിയ ബാങ്കില്‍ ഇത്തരമൊരു വിവരച്ചോര്‍ച്ച റിപ്പോര്‍ട്ട് ചെയ്തിരിക്കുന്നത്.