ആലുവ: നാലു ചുവരുകള്‍ക്കുള്ളില്‍ തളച്ചിടപ്പെടേണ്ടവരല്ല തങ്ങളെന്നും, തങ്ങളുടെ കൈകള്‍ക്കും അതിജീവനത്തിന്റെയും സ്വയംപര്യാപ്തതയുടെയും പുതിയ കഥകള്‍ രചിക്കാന്‍ കഴിയുമെന്നും തെളിയിക്കുകയാണ് ശ്രീമൂലനഗരം തണല്‍ ഗ്രാന്‍മ ഹോമിലെ അന്തേവാസികള്‍. മാനസിക-സാമൂഹിക വെല്ലുവിളികളെ അതിജീവിച്ച് മുന്നേറുന്ന ഈ മനുഷ്യര്‍ക്ക് ഇനി സ്വന്തം അധ്വാനത്തില്‍ തലയുയര്‍ത്തി നില്‍ക്കാം. ആസ്റ്റര്‍ ഡി.എം. ഫൗണ്ടേഷന്റെ കരുതലില്‍ തണല്‍ ഗ്രാന്‍മ ഹോമില്‍ തുടക്കമിട്ട ലിക്വിഡ് ഡിറ്റര്‍ജന്റ്, ഡിഷ് വാഷ്, സോപ്പ് നിര്‍മ്മാണ യൂണിറ്റ് ഇവിടുത്തെ അന്തേവാസികളുടെ ജീവിതത്തില്‍ പുനരധിവാസത്തിന്റെ പുത്തന്‍ അധ്യായം രചിക്കുകയാണ്.
മാനസികാരോഗ്യം വീണ്ടെടുക്കുന്നതിനൊപ്പം, തൊഴില്‍പരമായ പരിശീലനം നല്‍കി അന്തേവാസികളുടെ ആത്മവിശ്വാസം ഉയര്‍ത്തുക എന്ന വലിയ ലക്ഷ്യത്തോടെയാണ് പദ്ധതിക്ക് രൂപം നല്‍കിയിരിക്കുന്നത്. ഉല്‍പ്പന്നങ്ങള്‍ നിര്‍മ്മിച്ച് വരുമാനം കണ്ടെത്താന്‍ പ്രാപ്തരാകുന്നതോടെ, സമൂഹത്തില്‍ മാന്യമായ സ്ഥാനം നേടിയെടുക്കാന്‍ ഇവര്‍ക്ക് സാധിക്കും.
ബെന്നി ബഹനാന്‍ എംപി നിര്‍മ്മാണ യൂണിറ്റിന്റെ ഉദ്ഘാടനം നിര്‍വഹിച്ചു. പദ്ധതിയുടെ ലോഗോ എം.എല്‍.എ. അന്‍വര്‍ സാദത്ത് പ്രകാശനം ചെയ്തു. തണല്‍ ഗ്രാന്‍മ ഹോം സെക്രട്ടറി സമദ് പി.ഐ. അധ്യക്ഷത വഹിച്ച ചടങ്ങില്‍ ആസ്റ്റര്‍ ഡി.എം. ഫൗണ്ടേഷന്‍ സീനിയര്‍ മാനേജര്‍ ലത്തീഫ് കാസിം, കോര്‍ഡിനേറ്റര്‍ സാദിഖ് എന്നിവരും പങ്കെടുത്തു.
ശ്രീമൂലനഗരം ഗ്രാമപഞ്ചായത്ത് പ്രസിഡന്റ് പ്രിന്‍സി ഡേവിസ്, വൈസ് പ്രസിഡന്റ് പി. കെ. സിറാജ്, പഞ്ചായത്ത് അംഗം മുഹ്‌സിന സുബൈര്‍, സീനത്ത് സാഹിര്‍, ശ്രീമൂലനഗരം മോഹന്‍, തണല്‍ വൈസ് ചെയര്‍മാന്മാരായ ടി. എസ്. അമീര്‍, റോയല്‍ റഫീഖ് എന്നിവ ആശംസകള്‍ നേര്‍ന്നു.
ആസ്റ്റര്‍ ഡി.എം. ഫൗണ്ടേഷന്റെ സാമൂഹിക ഉത്തരവാദിത്തവും തണല്‍ ഗ്രാന്‍മ ഹോമിന്റെ സ്‌നേഹവും കൈകോര്‍ക്കുമ്പോള്‍, ഇതൊരു ലളിതമായ ഉല്‍പ്പാദന യൂണിറ്റ് മാത്രമല്ല, മറിച്ച് പാര്‍ശ്വവല്‍ക്കരിക്കപ്പെട്ട മനുഷ്യര്‍ക്ക് മാന്യമായി ജീവിക്കാനുള്ള പ്രതീക്ഷയുടെ ചിറകുകള്‍ കൂടിയാണ്. സഹാനുഭൂതിയും സഹകരണവും ഒത്തുചേരുമ്പോള്‍ സമൂഹത്തില്‍ എങ്ങനെയുള്ള മാറ്റങ്ങള്‍ സൃഷ്ടിക്കാമെന്നതിന് മികച്ച മാതൃകയാവുകയാണ് ഈ സംരംഭം.
