റിയാദ്: സൗദി അറേബ്യയുടെ കിഴക്കന്‍ പ്രവിശ്യയിലുള്ള എണ്ണപ്പാടത്തും വിമാനത്താവളത്തിലും ഉണ്ടായ വ്യത്യസ്ത ഡ്രോണ്‍ ആക്രമണങ്ങളില്‍ മൂന്ന് പേര്‍ കൊല്ലപ്പെട്ടു. സംഭവത്തില്‍ നിരവധി പേര്‍ക്ക് പരിക്കേല്‍ക്കുകയും ചെയ്തു.
സൗദി അറാകോയുടെ ശൈബ എണ്ണപ്പാടത്തെ സംസ്‌കരണ കേന്ദ്രം ലക്ഷ്യമിട്ടെത്തിയ ഡ്രോണ്‍ വ്യോമ പ്രതിരോധ സേന തകര്‍ത്തെങ്കിലും, വീണുകിടന്ന അവശിഷ്ടങ്ങള്‍ പതിച്ച് രണ്ട് പേര്‍ കൊല്ലപ്പെടുകയും മറ്റ് രണ്ട് പേര്‍ക്ക് പരിക്കേല്‍ക്കുകയും ചെയ്തു. എണ്ണപ്പാടത്തിന് പുറത്ത് കരാറുകാരുടെ ഉടമസ്ഥതയിലുള്ള ഒരു വാഹനത്തിന് തീപിടിച്ചതായി ഊര്‍ജ മന്ത്രാലയം അറിയിച്ചു. എന്നാല്‍ എണ്ണപ്പാടത്തിന്റെ പ്രവര്‍ത്തനങ്ങളെ ഇത് ബാധിച്ചിട്ടില്ല. കൊല്ലപ്പെട്ടവരില്‍ ഫിലിപ്പീന്‍സ്, നേപ്പാള്‍ സ്വദേശികളും, പരിക്കേറ്റവരില്‍ പാകിസ്ഥാന്‍, ഇന്ത്യന്‍ പൗരന്മാരും ഉള്‍പ്പെടുന്നു.
അതേസമയം, ദമാമിലെ കിങ് ഫഹദ് വിമാനത്താവളത്തിലുണ്ടായ ആക്രമണത്തില്‍ ഒരാള്‍ കൊല്ലപ്പെടുകയും എട്ട് പേര്‍ക്ക് പരിക്കേല്‍ക്കുകയും ചെയ്തതായി സൗദി ജനറല്‍ അതോറിറ്റി ഓഫ് സിവില്‍ ഏവിയേഷന്‍ വ്യക്തമാക്കി.
ചൊവ്വാഴ്ചയും ബുധനാഴ്ചയുമായി സൗദി അറേബ്യ ലക്ഷ്യമിട്ടെത്തിയ നിരവധി ഡ്രോണുകള്‍ തകര്‍ത്തതായി യെമനിലെ നിയമപരമായ തിരിച്ചുവരവിനായുള്ള സഖ്യസേന അറിയിച്ചു. പ്രവാചകന്റെ പള്ളിയുള്ള മദീന പ്രവിശ്യ ഉള്‍പ്പെടെയുള്ള പ്രദേശങ്ങള്‍ ലക്ഷ്യമിട്ട് എത്തിയ ഡ്രോണുകളാണ് വ്യോമ പ്രതിരോധ സേന വെടിവെച്ചിട്ടത്. സഖ്യസേന വക്താവ് മേജര്‍ ജനറല്‍ തുര്‍ക്കി അല്‍ മലിക്കിയാണ് ഇക്കാര്യം സമൂഹ മാധ്യമമായ എക്‌സിലൂടെ അറിയിച്ചത്.
Related News
