അമ്മാന്‍ - ജോര്‍ദാനിലെ കരാക് പ്രവിശ്യയിലുള്ള ഗ്രീക്ക് ഓര്‍ത്തഡോക്‌സ് പള്ളിയിലുണ്ടായ ക്രൂരമായ ഭീകരാക്രമണത്തില്‍ ഏഴ് പേര്‍ കൊല്ലപ്പെടുകയും 40 പേര്‍ക്ക് പരിക്കേല്‍ക്കുകയും ചെയ്ത സാഹചര്യത്തില്‍ രാജ്യത്തുടനീളം സുരക്ഷ ശക്തമാക്കിയതായി യു.എസ് എംബസി അറിയിച്ചു. പ്രാര്‍ത്ഥനയ്ക്കായി ഒത്തുകൂടിയ ജനങ്ങള്‍ക്ക് നേരെ തീവ്രവാദികള്‍ നടത്തിയ വെടിവെപ്പിനെ തുടര്‍ന്ന് വിദേശ എംബസികള്‍, ഷോപ്പിംഗ് മാളുകള്‍, മറ്റ് പ്രധാന പൊതുയിടങ്ങള്‍ എന്നിവിടങ്ങളിലാണ് സുരക്ഷ കര്‍ശനമാക്കിയത്.
ഹമൂദ് ഗ്രാമത്തിലെ സെയ്ന്റ് ജോര്‍ജ്ജ് പള്ളിയില്‍ മൃതദേഹ സംസ്‌കാര ചടങ്ങ് നടക്കുന്നതിനിടയിലാണ് തോക്കുധാരികളായ അക്രമികള്‍ ഏതാനും മിനിറ്റുകളോളം തുടര്‍ച്ചയായി വെടിയുതിര്‍ത്തതെന്ന് ജോര്‍ദാന്‍ പബ്ലിക് സെക്യൂരിറ്റി ഡയറക്ടറേറ്റ് തലവന്‍ വ്യക്തമാക്കി. ആക്രമണത്തിന്റെ ഉത്തരവാദിത്തം ആരും ഏറ്റെടുത്തിട്ടില്ല. പ്രതികള്‍ക്കായി തെരച്ചില്‍ പുരോഗമിക്കുകയാണെന്നും ഇവര്‍ക്ക് അകത്തോ പുറത്തോ ഉള്ള ഭീകരസംഘടനകളുമായി ബന്ധമുണ്ടോ എന്ന് വ്യക്തമാകാന്‍ സമയമെടുക്കുമെന്നും അധികൃതര്‍ അറിയിച്ചു.
സംഭവത്തിന് പിന്നാലെ സ്ഥലം സന്ദര്‍ശിച്ച ജോര്‍ദാനിലെ അബ്ദുള്ള രാജാവ്, അക്രമികള്‍ക്കെതിരെ ഇരുമ്പുമുഷ്ടി ഉപയോഗിച്ച് കടുത്ത ശിക്ഷ ഉറപ്പാക്കുമെന്ന് പ്രഖ്യാപിച്ചു. അന്ധമായ തീവ്രവാദ ആശയങ്ങളുടെ ഫലമാണ് ഈ ആക്രമണമെന്നും സമൂഹത്തെ ഈ വഴിക്ക് പോകാന്‍ അനുവദിക്കില്ലെന്നും പ്രധാനമന്ത്രി ജാഫര്‍ ഹസ്സന്‍ വ്യക്തമാക്കി. ജോര്‍ദാനില്‍ ഇത്തരം ആക്രമണങ്ങള്‍ അപൂര്‍വ്വമാണെങ്കിലും മുന്‍വര്‍ഷങ്ങളില്‍ ഭീകരാക്രമണ ശ്രമങ്ങള്‍ ആവര്‍ത്തിച്ച് തടഞ്ഞിട്ടുണ്ടെന്ന് സുരക്ഷാ ഏജന്‍സികള്‍ ചൂണ്ടിക്കാട്ടുന്നു. ക്രിസ്ത്യന്‍ തീര്‍ത്ഥാടന കേന്ദ്രങ്ങള്‍ നിലനില്‍ക്കുന്ന ജോര്‍ദാനില്‍ പള്ളികള്‍ക്ക് നേരെയുണ്ടായ ഈ ആക്രമണം വലിയ നടുക്കമാണ് സൃഷ്ടിച്ചിരിക്കുന്നത്.
Related News
