റിയാദ്- സൗദി അറേബ്യയിലെ റിയാദിലുള്ള കിംഗ് ഖാലിദ് അന്താരാഷ്ട്ര വിമാനത്താവളത്തില്‍ ഒക്ടോബര്‍ 25 മുതല്‍ അന്താരാഷ്ട്ര സര്‍വീസുകള്‍ ടെര്‍മിനല്‍ 2 വഴിയും ആഭ്യന്തര സര്‍വീസുകള്‍ ടെര്‍മിനല്‍ 1 വഴിയും പ്രവര്‍ത്തിക്കുമെന്ന് അധികൃതര്‍ അറിയിച്ചു. ടിക്കറ്റ് കണ്‍ഫേം ചെയ്ത യാത്രക്കാര്‍ വിമാനത്താവളത്തിലേക്ക് പുറപ്പെടുന്നതിന് മുന്‍പായി ബന്ധപ്പെട്ട എയര്‍ലൈനുകളുമായി ബന്ധപ്പെട്ട് ഫ്‌ളൈറ്റ് വിവരങ്ങള്‍ സ്ഥിരീകരിക്കണമെന്ന് അതോറിറ്റി ആവശ്യപ്പെട്ടു.

ഒക്ടോബര്‍ 10-നുണ്ടായ ഹൂത്തി ഭീകരാക്രമണത്തെ തുടര്‍ന്ന് റിയാദ് വിമാനത്താവളത്തിന്റെ പ്രവര്‍ത്തനം താല്‍ക്കാലികമായി നിര്‍ത്തിവെച്ചിരുന്നു. ആദ്യ ആക്രമണത്തില്‍ ഒന്‍പത് വിദേശികളും നാല് സൗദി പൗരന്മാരും ഉള്‍പ്പെടെ 13 പേര്‍ കൊല്ലപ്പെടുകയും 300-ഓളം പേര്‍ക്ക് പരിക്കേല്‍ക്കുകയും ചെയ്തിരുന്നു. തൊട്ടുപിന്നാലെ ഒക്ടോബര്‍ 11-നുണ്ടായ മറ്റൊരു ആക്രമണത്തില്‍ ഒരു പാക്കിസ്ഥാന്‍ സ്വദേശിയും കൊല്ലപ്പെട്ടു.

ആക്രമണങ്ങളെ തുടര്‍ന്ന് സൗദി തലസ്ഥാനത്തേക്കുള്ള ആയിരക്കണക്കിന് സര്‍വീസുകളാണ് ആഴ്ചകളോളം റദ്ദാക്കേണ്ടി വന്നത്. ഇത്തിഹാദ് എയര്‍വേസ് അബുദാബിക്കും റിയാദിനും ദമാമിനുമിടയിലുള്ള വിമാനങ്ങള്‍ നവംബര്‍ 5 വരെയും, ഫ്‌ളൈദുബായ് ഒക്ടോബര്‍ 29 വരെയുള്ള സര്‍വീസുകളും റദ്ദാക്കിയിരുന്നു. നിലവില്‍ വിമാനത്താവള ടെര്‍മിനലുകളുടെ സുരക്ഷയും കേടുപാടുകളും വിലയിരുത്തിക്കൊണ്ട് ഘട്ടം ഘട്ടമായി സര്‍വീസുകള്‍ സാധാരണ നിലയിലാക്കാനുള്ള ശ്രമത്തിലാണ് അധികൃതര്‍.