കൊച്ചി- കൊച്ചിയില്‍ ഞായറാഴ്ച പുലര്‍ച്ചെയുണ്ടായ വാഹനാപകടത്തില്‍ സ്‌കൂട്ടര്‍ യാത്രക്കാരനായ 55-കാരന്‍ കൊല്ലപ്പെട്ടു. ഇരിങ്ങാലക്കുട അഡീഷണൽ ഡിസ്ട്രിക്ട് ജഡ്ജിയുടെ 17 വയസ്സുള്ള മകന്‍ ഓടിച്ച മെഴ്സിഡസ് ബെന്‍സ് ആഡംബര കാര്‍ സ്‌കൂട്ടറിന് പിന്നിലിടിച്ചാണ് അപകടമുണ്ടായത്. വാഹനം ജുഡീഷ്യല്‍ ഓഫീസറുടെ പേരില്‍ രജിസ്റ്റര്‍ ചെയ്തതാണെന്ന് പൊലീസ് കണ്ടെത്തി. പുലര്‍ച്ചെ രണ്ടിനും മൂന്നിനുമിടയിലാണ് സംഭവം.

ഭക്ഷണശാല നടത്തിവന്നിരുന്ന ജയബാലകൃഷ്ണനാണ് അപകടത്തില്‍ മരിച്ചത്. ജോലി കഴിഞ്ഞ് വീട്ടിലേക്ക് മടങ്ങുന്ന വഴിയായിരുന്നു അപകടം. കാറിന്റെ അമിതവേഗം കാരണം സ്‌കൂട്ടര്‍ തകരുകയും അതിലുണ്ടായിരുന്ന സാധനങ്ങള്‍ റോഡില്‍ ചിതറിത്തെറിക്കുകയും ചെയ്തുവെന്നും അദ്ദേഹം സംഭവസ്ഥലത്തുതന്നെ മരിച്ചുവെന്നും ബന്ധുക്കള്‍ പറഞ്ഞു.

അപകടസമയത്ത് കുട്ടി മദ്യപിച്ചിരുന്നില്ലെന്നാണ് പ്രാഥമിക പരിശോധനയിലെ വിവരമെങ്കിലും കൂടുതല്‍ പരിശോധനക്കായി രക്തസാമ്പിളുകള്‍ ശേഖരിച്ചിട്ടുണ്ടെന്ന് പൊലീസ് അറിയിച്ചു. 17-കാരനായ ഡ്രൈവറെ പൊലീസ് കസ്റ്റഡിയിലെടുത്തു. അശ്രദ്ധമായി വാഹനമോടിച്ചതിനും അശ്രദ്ധമൂലം മരണത്തിന് കാരണമായതിനും കേസെടുത്തിട്ടുണ്ട്.

അതേസമയം, പ്രായപൂര്‍ത്തിയാകാത്ത മകന് വാഹനം നല്‍കിയതിനെക്കുറിച്ച് പൊലീസ് സ്റ്റേഷനില്‍ ചോദ്യം ചെയ്തപ്പോള്‍ ജഡ്ജി തങ്ങളോട് മോശമായി സംസാരിച്ചതായി മരിച്ച ജയബാലകൃഷ്ണന്റെ സഹോദരീപുത്രി ആരോപിച്ചു. ലൈസന്‍സില്ലാതെ വാഹനം നല്‍കുന്നവര്‍ക്ക് ഇതൊരു പാഠമാകണമെന്നും കേസുമായി മുന്നോട്ട് പോകുമെന്നും കുടുംബം വ്യക്തമാക്കി.