ജിദ്ദ: പ്രവാസി കുടുംബങ്ങള്‍ക്ക് സുരക്ഷയും കരുതലും ഉറപ്പാക്കുക എന്ന ലക്ഷ്യത്തോടെ ജിദ്ദ കെ.എം.സി.സി സെന്‍ട്രല്‍ കമ്മിറ്റി നടപ്പിലാക്കുന്ന 'കാരുണ്യഹസ്തം കുടുംബസുരക്ഷാ പദ്ധതി 2027' പ്രചാരണ പ്രവര്‍ത്തനങ്ങള്‍ക്ക് വനിതാ വിങ്ങിന്റെ നേതൃത്വത്തില്‍ പ്രൗഢോജ്ജ്വല തുടക്കമായി. പദ്ധതിയുടെ അംഗത്വ ക്യാമ്പയിന്‍ ഒക്ടോബര്‍ 15 മുതല്‍ ഡിസംബര്‍ 15 വരെയാണ് നടക്കുന്നത്.

ആദ്യമായാണ് വനിതാ വിങ്ങിന്റെ നേതൃത്വത്തില്‍ ജിദ്ദയിലെ പ്രവാസി വനിതകള്‍ക്കായി പ്രത്യേകമായി ഒരു ക്യാമ്പയിന്‍ സംഘടിപ്പിക്കുന്നത്. ഈ പദ്ധതിയുടെ സന്ദേശം ജിദ്ദയിലെ മുഴുവന്‍ വനിതകളിലേക്കും എത്തിക്കുന്നതിനും, പരമാവധി ആളുകളെ ഇതിന്റെ ഭാഗമാക്കുന്നതിനുമായി വിപുലമായ പ്രചാരണ പരിപാടികള്‍ സംഘടിപ്പിക്കാന്‍ യോഗം തീരുമാനിച്ചു.

കഴിഞ്ഞ 17 വര്‍ഷമായി കുടുംബനാഥന്‍ നഷ്ടപ്പെട്ട ആയിരക്കണക്കിന് പ്രവാസി കുടുംബങ്ങള്‍ക്ക് അത്താണിയായും, വിവിധ രോഗങ്ങളാല്‍ പ്രയാസപ്പെടുന്നവര്‍ക്ക് താങ്ങും തണലായും പ്രവര്‍ത്തിക്കുന്ന ഈ പദ്ധതിയില്‍ ജാതി-മത ഭേദമന്യേ ജിദ്ദയിലുള്ള ഏതൊരു മലയാളിക്കും അംഗമാകാം.

വനിതാ വിങ് പ്രസിഡന്റ് മുംതാസ് പാലോളിയുടെ അധ്യക്ഷതയില്‍ ചേര്‍ന്ന യോഗം ജിദ്ദ കെ.എം.സി.സി സെന്‍ട്രല്‍ കമ്മിറ്റി ജനറല്‍ സെക്രട്ടറി വി.പി. മുസ്തഫ ഉദ്ഘാടനം ചെയ്തു. സെക്രട്ടറി സാബില്‍ മമ്പാട്, ഹസീന എന്നിവര്‍ സംസാരിച്ചു. കാരുണ്യഹസ്തം കോര്‍ഡിനേറ്റര്‍മാരായ മിസ്രിയ ഹമീദ്, സലീന ഇബ്രാഹിം എന്നിവര്‍ ആവശ്യമായ നിര്‍ദ്ദേശങ്ങള്‍ നല്‍കി.

ബസ്മ സാബില്‍, ഇര്‍ഷാദ ഇല്യാസ്, ഹാജറ ബഷീര്‍, സുരയ്യ കാരി, നസീമ ഹൈദര്‍ എന്നിവര്‍ പരിപാടിക്ക് നേതൃത്വം നല്‍കി. ഷമീല മൂസ സ്വാഗതവും നസീഹ അന്‍വര്‍ നന്ദിയും പറഞ്ഞു. പ്രവാസി സമൂഹത്തിന്റെ ക്ഷേമവും കുടുംബസുരക്ഷയും ലക്ഷ്യമിട്ട് നടപ്പിലാക്കുന്ന ഈ സംരംഭം ജിദ്ദ കെ.എം.സി.സി.യുടെ സാമൂഹിക പ്രതിബദ്ധതയുടെ മകുടോദാഹരണമായി മാറുകയാണ്.