നാലു സ്വരങ്ങള്‍ മാത്രം ഉപയോഗിച്ച് ഒരു ഗാനമോ? സംശയത്തോടെ കേട്ടുനില്‍ക്കുന്നവര്‍ക്ക് മുന്നില്‍ വിസ്മയം തീര്‍ത്ത ആ ഗാനം ഇന്നും സംഗീതാസ്വാദകരുടെ ഹൃദയത്തിലുണ്ട്. അടുത്തിടെ അന്തരിച്ച മാപ്പിള സംഗീതത്തിന്റെ സുല്‍ത്താന്‍ കോഴിക്കോട് അബൂബക്കര്‍ സംഗീത സംവിധാനം നിര്‍വഹിച്ച്, ഗന്ധര്‍വ്വ ഗായകന്‍ കെ.ജെ. യേശുദാസ് തരംഗിണി കാസെറ്റ്‌സിനുവേണ്ടി പാടിയ ആ സുന്ദര ഗാനം മലയാളികള്‍ ഒരിക്കലും മറക്കില്ല. 'നി, സ, രി, ഗ' എന്നീ നാല് സ്വരങ്ങള്‍ മാത്രം കോര്‍ത്തിണക്കി ഒരുക്കിയ ആ ഗാനം ഇപ്പോള്‍ പ്രശസ്ത ഗായകന്‍ ഫലാഹ് അലി പുതിയ കാലത്തിന്റെ ശൈലിയില്‍ പുനരാവിഷ്‌കരിക്കുകയാണ്.

ഏതു പാട്ടും ശ്രുതിമധുരമാകണമെങ്കില്‍ അതിന്റെ വരികളും അര്‍ത്ഥവത്തായിരിക്കണം. പ്രശസ്ത ഗാനരചയിതാവ് ബാപ്പു വെള്ളിപ്പറമ്പ് എഴുതിയ വരികള്‍ തന്നെയാണ് ഈ ഗാനത്തിന്റെ ആത്മാവ്.

'കരയാനും പറയാനും മനംതുറന്നിരക്കാനും നീയല്ലാതാരുമില്ല കോനേ...'

എന്ന് തുടങ്ങുന്ന വരികളില്‍ നിറഞ്ഞത് സാധാരണക്കാരന്റെ പ്രാര്‍ത്ഥനയും നിസ്സഹായാവസ്ഥയും ഭക്തിയും കൂടിയാണ്. പല്ലവിയില്‍ മാത്രമല്ല, അനുപല്ലവിയിലും ഒരേ നാല് സ്വരങ്ങള്‍ തന്നെയാണ് സംഗീത സംവിധായകന്‍ ഉപയോഗിച്ചിരിക്കുന്നത് എന്നതും ഈ ഗാനത്തിന്റെ സവിശേഷതയാണ്. മാപ്പിളപ്പാട്ടിന്റെ തനിമയോടെ പിറന്നുവെങ്കിലും അതിരുകള്‍ ഭേദിച്ച് കേരള സമൂഹം ഒരേപോലെ ഏറ്റെടുത്ത പാട്ടുകളിലൊന്നാണിത്.

കാലങ്ങള്‍ കഴിഞ്ഞിട്ടും സംഗീതപ്രേമികളുടെ മനസ്സില്‍ മായാതെ നില്‍ക്കുന്ന ഈ മാപ്പിളപ്പാട്ട്, ഫലാഹ് അലിയുടെ ആലാപനത്തിലൂടെ പുതിയ തലമുറയിലേക്കും എത്തുമ്പോള്‍ അത് മാപ്പിള സംഗീത ശാഖയ്ക്ക് ലഭിക്കുന്ന മറ്റൊരു മനോഹരമായ സമ്മാനമായി മാറുകയാണ്.