ന്യൂഡല്‍ഹി: തന്റെ ഓര്‍മക്കുറിപ്പുകള്‍ പുറത്തിറങ്ങുന്നതോടെ പല വിവാദങ്ങളും ചര്‍ച്ചകളും ഉണ്ടാകുമെന്ന് സൂചിപ്പിച്ച് കോണ്‍ഗ്രസ് പാര്‍ലമെന്ററി പാര്‍ട്ടി അധ്യക്ഷ സോണിയ ഗാന്ധി. ആത്മകഥ പ്രസിദ്ധീകരിക്കുമ്പോള്‍ ചില 'തമാശകള്‍' ഉണ്ടാകുമെന്ന് അവര്‍ എക്‌സില്‍ പോസ്റ്റ് ചെയ്ത വീഡിയോയില്‍ പറഞ്ഞു. കഴിഞ്ഞയാഴ്ച എക്‌സില്‍ ജോയിന്‍ ചെയ്ത ശേഷം സോണിയ പോസ്റ്റ് ചെയ്യുന്ന രണ്ടാമത്തെ വീഡിയോയാണ് ഇത്. ഒന്നര മിനിറ്റോളം ദൈര്‍ഘ്യമുള്ളതാണ് വീഡിയൊ. രാജീവ് ഗാന്ധിയുടെ രാഷ്ട്രീയ പ്രവേശത്തെക്കുറിച്ച ചില കാര്യങ്ങള്‍ അവ്യക്തമായി പറയുന്നതും വീഡിയോയിലുണ്ട്. ആത്മകഥയില്‍ കേന്ദ്ര സര്‍ക്കാര്‍ മാറ്റങ്ങള്‍ ആവശ്യപ്പെട്ടുവെന്ന വിവാദങ്ങള്‍ക്കിടെയാണ് പുസ്തകം പുറത്തുവരുന്നത്. പെന്‍ഗ്വിനുമായുള്ള ആദ്യ കരാര്‍ റദ്ദാക്കിയിരുന്നു. മാറ്റമില്ലാതെ ആത്മകഥ പ്രസിദ്ധീകരിക്കാന്‍ ഹാര്‍പര്‍ കോളിന്‍സാണ് തയാറായത്.
'പതിറ്റാണ്ടുകളായി മറ്റുള്ളവര്‍ എന്റെ കഥ പറഞ്ഞുകൊണ്ടിരിക്കുകയാണ്. ഇനി എന്റെ ഊഴമാണ്,' എന്നായിരുന്നു സോണിയ ഗാന്ധിയുടെ പ്രതികരണം. നവംബര്‍ 10ന് പുസ്തകം പുറത്തിറങ്ങാനിരിക്കെയാണ് അവരുടെ പരാമര്‍ശം.
തന്റെ ജീവിതത്തെയും രാഷ്ട്രീയ അനുഭവങ്ങളെയും കുറിച്ച് മറ്റുള്ളവര്‍ എഴുതുകയും സംസാരിക്കുകയും ചെയ്ത സാഹചര്യത്തില്‍, സ്വന്തം കാഴ്ചപ്പാടില്‍ കാര്യങ്ങള്‍ അവതരിപ്പിക്കാനുള്ള അവസരമാണ് ഓര്‍മക്കുറിപ്പിലൂടെ ലഭിക്കുന്നതെന്ന് സോണിയ വിശദീകരിച്ചു.
സോണിയ ഗാന്ധിയുടെ രാഷ്ട്രീയ ജീവിതവും വ്യക്തിപരമായ അനുഭവങ്ങളും കോണ്‍ഗ്രസിന്റെ ചരിത്രത്തിലെ നിര്‍ണായക ഘട്ടങ്ങളുമായുള്ള ബന്ധവും പുസ്തകത്തില്‍ ഇടംപിടിക്കുമോയെന്ന ആകാംക്ഷയിലാണ് രാഷ്ട്രീയ നിരീക്ഷകര്‍. എന്നാല്‍ പുസ്തകത്തിലെ ഉള്ളടക്കത്തെക്കുറിച്ചുള്ള വിശദാംശങ്ങള്‍ പുറത്തുവന്നിട്ടില്ല.
ഓര്‍മക്കുറിപ്പുകള്‍ പുറത്തിറങ്ങുന്നതോടെ സോണിയ ഗാന്ധിയുടെ ജീവിതത്തെയും രാഷ്ട്രീയ നിലപാടുകളെയും കുറിച്ച് പുതിയ ചര്‍ച്ചകള്‍ക്ക് വഴിതുറക്കുമെന്നാണ് പ്രതീക്ഷിക്കുന്നത്.
.jpg)
Related News
