ടെല്‍ അവീവ്: ഇസ്രായിലിലെ പാര്‍ലമെന്റ് തിരഞ്ഞെടുപ്പില്‍ പ്രധാനമന്ത്രി ബെഞ്ചമിന്‍ നെതന്യാഹുവിന്റെ സഖ്യവും പ്രതിപക്ഷ നേതാവ് ഗാദി ഐസന്‍കോട്ടിന്റെ നേതൃത്വത്തിലുള്ള സഖ്യവും തമ്മില്‍ ഇഞ്ചോടിഞ്ച് പോരാട്ടമെന്ന് എക്‌സിറ്റ് പോള്‍ ഫലങ്ങള്‍. പുറത്തുവന്ന മൂന്ന് എക്‌സിറ്റ് പോളുകളില്‍ രണ്ടെണ്ണം ഇരു സഖ്യങ്ങള്‍ക്കും 51 സീറ്റ് വീതം പ്രവചിച്ചപ്പോള്‍, മൂന്നാമത്തേത് നെതന്യാഹുവിന്റെ സഖ്യത്തിന് 52 സീറ്റും ഐസന്‍കോട്ടിന്റെ സഖ്യത്തിന് 50 സീറ്റുമാണ് കണക്കാക്കുന്നത്. ആര്‍ക്കും കേവല ഭൂരിപക്ഷം ലഭിക്കില്ലെന്നാണ് നിലവിലെ സൂചന.
ഇസ്രായില്‍ പാര്‍ലമെന്റായ നെസറ്റിലെ 120 സീറ്റുകളിലേക്കാണ് തിരഞ്ഞെടുപ്പ് നടന്നത്. ഭൂരിപക്ഷത്തോടെ സര്‍ക്കാര്‍ രൂപീകരിക്കാന്‍ 61 സീറ്റുകള്‍ വേണം. ഒരു പാര്‍ട്ടിക്കും ഒറ്റയ്ക്ക് ഭൂരിപക്ഷം നേടാനായിട്ടില്ലാത്ത ഇസ്രായിലില്‍ വിവിധ പാര്‍ട്ടികള്‍ ചേര്‍ന്നുള്ള സഖ്യസര്‍ക്കാരുകളാണ് പതിവ്.
പുതുതായി രൂപീകരിച്ച യാഷര്‍ പാര്‍ട്ടിയുടെ നേതാവായ ഗാദി ഐസന്‍കോട്ടാണ് നെതന്യാഹുവിനെ അധികാരത്തില്‍നിന്ന് പുറത്താക്കുകയെന്ന ലക്ഷ്യത്തോടെ ഒന്നിച്ച പ്രതിപക്ഷ സഖ്യത്തിലെ പ്രധാന മുഖം. നെതന്യാഹുവിന്റെ ലിക്കുഡ് പാര്‍ട്ടി പാര്‍ലമെന്റിലെ ഏറ്റവും വലിയ ഒറ്റക്കക്ഷിയാകുമെന്നാണ് എക്‌സിറ്റ് പോളുകള്‍ സൂചിപ്പിക്കുന്നത്.
എക്‌സിറ്റ് പോളുകള്‍ അന്തിമ ഫലമല്ലെന്നും മുന്‍ തിരഞ്ഞെടുപ്പുകളില്‍ അവയുടെ പ്രവചനങ്ങള്‍ തെറ്റിയിട്ടുണ്ടെന്നും വിലയിരുത്തലുണ്ട്. ഏതാനും സീറ്റുകളുടെ വ്യത്യാസം പോലും സര്‍ക്കാര്‍ രൂപീകരണത്തില്‍ നിര്‍ണായകമാകുന്ന ഇസ്രായിലില്‍ അന്തിമ ഫലത്തിനായി കാത്തിരിക്കുകയാണ് രാഷ്ട്രീയ പാര്‍ട്ടികള്‍.
വോട്ടെണ്ണലിന്റെ ആദ്യഘട്ടത്തില്‍ 2.5 ശതമാനം വോട്ടുകളാണ് എണ്ണിത്തീര്‍ന്നിരുന്നത്. പൂര്‍ണമായ ഫലങ്ങള്‍ പുറത്തുവരാന്‍ ദിവസങ്ങള്‍ വേണ്ടിവന്നേക്കാം.
ആര്‍ക്കും വ്യക്തമായ ഭൂരിപക്ഷം ലഭിക്കാത്ത സാഹചര്യമുണ്ടായാല്‍ സര്‍ക്കാര്‍ രൂപീകരണത്തിനായി ആഴ്ചകളോ മാസങ്ങളോ നീളുന്ന ചര്‍ച്ചകള്‍ വേണ്ടിവന്നേക്കും. വിവിധ പാര്‍ട്ടികളുടെ പിന്തുണ ഉറപ്പാക്കുന്നതിനുള്ള നീക്കങ്ങള്‍ ഫലപ്രഖ്യാപനത്തിനുശേഷം നിര്‍ണായകമാകും.
2023 ഒക്ടോബര്‍ 7ലെ ആക്രമണങ്ങള്‍ക്കുശേഷമുള്ള ആദ്യ പാര്‍ലമെന്റ് തിരഞ്ഞെടുപ്പാണിത്. സുരക്ഷ, യുദ്ധം, രാജ്യത്തിന്റെ രാഷ്ട്രീയ ഭാവി എന്നിവ ഉള്‍പ്പെടെയുള്ള വിഷയങ്ങള്‍ തിരഞ്ഞെടുപ്പ് പ്രചാരണത്തില്‍ പ്രധാന ചര്‍ച്ചകളായിരുന്നു.