ഉമ്മുല്‍ ഫഹം: ഇസ്രായില്‍ പാര്‍ലമെന്റ് തിരഞ്ഞെടുപ്പില്‍ അറബ് പാര്‍ട്ടികള്‍ക്ക് റെക്കോര്‍ഡ് നേട്ടവും അറബ് വോട്ടര്‍മാരുടെ ഉയര്‍ന്ന പങ്കാളിത്തവും ഉണ്ടായതായി എക്‌സിറ്റ് പോള്‍ സൂചനകള്‍. അറബ് സമൂഹത്തിന്റെ വോട്ടുകള്‍ സമാഹരിക്കാന്‍ പ്രചാരണം നടത്തിയ യുവ അഭിഭാഷകന്‍ മഹ്ദി കബാഹ ഈ തിരഞ്ഞെടുപ്പ് രാത്രിയെ ചരിത്രപരമെന്നാണ് വിശേഷിപ്പിച്ചത്.
വടക്കന്‍ ഇസ്രായിലിലെ അറബ് ഭൂരിപക്ഷ നഗരമായ ഉമ്മുല്‍ ഫഹമില്‍ നിന്നുള്ള 29കാരനായ കബാഹ, അറബ് സമൂഹം വോട്ടെടുപ്പില്‍ പങ്കെടുത്ത് തങ്ങളുടെ രാഷ്ട്രീയ നിലപാട് വ്യക്തമാക്കിയെന്ന് പറഞ്ഞു.
'ഇത് ചരിത്രപരമായ രാത്രിയാണ്. അറബ് സമൂഹം വോട്ടെടുപ്പില്‍ സജീവമായി പങ്കെടുത്തു. ഞങ്ങള്‍ ഇവിടെയുണ്ട്, തീരുമാനമെടുക്കുന്ന പ്രക്രിയയുടെ ഭാഗവുമാണ് എന്ന സന്ദേശം അവര്‍ വ്യക്തമായി നല്‍കി,' കബാഹ പറഞ്ഞു.
ഇസ്രായിലിലെ ആകെ വോട്ടര്‍മാരില്‍ ഏകദേശം അഞ്ചിലൊന്ന് അറബ് വംശജരാണ്. എന്നാല്‍ കഴിഞ്ഞ തിരഞ്ഞെടുപ്പില്‍ ഇവരില്‍ പകുതിയിലധികം പേര്‍ മാത്രമാണ് വോട്ട് രേഖപ്പെടുത്തിയത്. ഇസ്രായില്‍ ഭരണസംവിധാനത്തിന് രാഷ്ട്രീയ സാധുത നല്‍കാന്‍ താല്‍പര്യമില്ലെന്ന നിലപാടാണ് പലരെയും വോട്ടെടുപ്പില്‍നിന്ന് അകറ്റിയതെന്ന് കബാഹ ചൂണ്ടിക്കാട്ടി.
ഇറ്റാമര്‍ ബെന്‍ഗ്വിറിനെപ്പോലുള്ള തീവ്ര വലതുപക്ഷ നിലപാടുകളുള്ള മന്ത്രിമാരെ അധികാരത്തില്‍നിന്ന് മാറ്റുന്നതിനായി അറബ് വോട്ടര്‍മാര്‍ വോട്ടെടുപ്പില്‍ പങ്കാളികളാകണമെന്നായിരുന്നു കബാഹയുടെ പ്രചാരണം. വോട്ടവകാശം ഉപയോഗിച്ച് സര്‍ക്കാരിന്റെ രൂപീകരണത്തിലും നയങ്ങളിലും സ്വാധീനം ചെലുത്താന്‍ അറബ് സമൂഹത്തിന് കഴിയുമെന്ന് അദ്ദേഹം വാദിച്ചു.
അറബ് പ്രദേശങ്ങളിലെ കുറ്റകൃത്യങ്ങളും ഫലപ്രദമായ പൊലീസ് നടപടികളുടെ അഭാവവും വോട്ടര്‍മാരെ ആശങ്കപ്പെടുത്തുന്ന പ്രധാന വിഷയങ്ങളാണ്. ഈ പ്രശ്‌നങ്ങള്‍ പരിഹരിക്കണമെന്ന ആവശ്യവും തിരഞ്ഞെടുപ്പ് ചര്‍ച്ചകളില്‍ ഉയര്‍ന്നു.
പ്രതിപക്ഷ നേതാവ് യായര്‍ ഗോലാനും ബെന്‍ഗ്വിറും പ്രതിനിധീകരിക്കുന്ന രാഷ്ട്രീയ നിലപാടുകള്‍ തമ്മില്‍ വലിയ വ്യത്യാസമുണ്ടെന്നും കബാഹ അഭിപ്രായപ്പെട്ടു. കൂടുതല്‍ ഭൂമി കൈവശപ്പെടുത്തുകയും പലസ്തീനികളെ പുറത്താക്കുകയും ചെയ്യണമെന്ന നിലപാടും ഇരു ജനവിഭാഗങ്ങള്‍ക്കും പരിഹാരം കണ്ടെത്താനുള്ള സമീപനവും തമ്മിലുള്ള വ്യത്യാസമാണ് അദ്ദേഹം ചൂണ്ടിക്കാട്ടിയത്.
അറബ് പാര്‍ട്ടികളുടെ അന്തിമ സീറ്റുനിലയും സര്‍ക്കാര്‍ രൂപീകരണത്തിലെ പങ്കും ഔദ്യോഗിക ഫലങ്ങള്‍ പുറത്തുവരുന്നതോടെ വ്യക്തമാകും. നെതന്യാഹുവിന്റെ സഖ്യവും പ്രതിപക്ഷ സഖ്യവും തമ്മിലുള്ള കടുത്ത മത്സരത്തില്‍ അറബ് വോട്ടര്‍മാരുടെ പങ്കാളിത്തം എത്രത്തോളം നിര്‍ണായകമാകുമെന്നതും ശ്രദ്ധേയമാണ്.