ബീജിംഗ് - മാംസ-ക്ഷീര ഉത്പാദനം വര്‍ദ്ധിപ്പിക്കുന്നതിനും ആഭ്യന്തര കന്നുകാലികളുടെ ഗുണനിലവാരം ഉയര്‍ത്തുന്നതിനുമായി പാശ്ചാത്യ രാജ്യങ്ങളില്‍ നിന്നുള്ള ഉയര്‍ന്ന ഗുണമേന്മയുള്ള കാളകളുടെ ബീജം ഇറക്കുമതി പുനഃസ്ഥാപിച്ച് ചൈന. സുരക്ഷാ-രാഷ്ട്രീയ കാരണങ്ങളാലും വ്യാപാര തര്‍ക്കങ്ങള്‍ മൂലവും മുന്‍വര്‍ഷങ്ങളില്‍ പ്രമുഖ രാജ്യങ്ങളില്‍ നിന്നുള്ള കന്നുകാലി ജനിതക ഉല്‍പ്പന്നങ്ങളുടെ ഇറക്കുമതി ചൈന തടഞ്ഞിരുന്നു. തുടര്‍ന്ന് ആഭ്യന്തര വിപണിയില്‍ അനുഭവപ്പെട്ട കടുത്ത ക്ഷാമം പരിഹരിക്കാനാണ് ഇപ്പോള്‍ ഓസ്ട്രേലിയ, കാനഡ തുടങ്ങിയ രാജ്യങ്ങളില്‍ നിന്നുള്ള ഇറക്കുമതി ചൈന വീണ്ടും ആരംഭിച്ചിരിക്കുന്നത്.

ഇത്തവണ കര്‍ശനമായ ഗുണനിലവാര മാനദണ്ഡങ്ങളോടെയാണ് ചൈനീസ് ഭരണകൂടം ഇറക്കുമതിക്ക് അനുമതി നല്‍കുന്നത്. വിതരണം ചെയ്യുന്ന രാജ്യങ്ങളിലെ മികച്ച 10 ശതമാനം ഉയര്‍ന്ന ഗുണനിലവാരമുള്ള കാളകളില്‍ നിന്നുള്ള വിത്ത് മാത്രമേ രാജ്യത്തേക്ക് പ്രവേശിപ്പിക്കുകയുള്ളൂ എന്ന് അധികൃതര്‍ വ്യക്തമാക്കി. ആംഗസ്, വാഗ്യൂ, ഹോള്‍സ്റ്റീന്‍, ജേഴ്സി വിഭാഗത്തില്‍പ്പെട്ട കന്നുകാലികളുടെ ഉത്പാദനക്ഷമത വര്‍ദ്ധിപ്പിക്കുകയാണ് ലക്ഷ്യം. യു.എസ്, ഓസ്ട്രേലിയ തുടങ്ങിയ രാജ്യങ്ങളിലെ കന്നുകാലികളെ അപേക്ഷിച്ച് ചൈനയിലെ ആഭ്യന്തര ഇനങ്ങള്‍ ഇറച്ചിയിലും പാല്‍ ഉത്പാദനത്തിലും ഏറെ പിന്നിലാണ്.

വളര്‍ന്നുവരുന്ന മധ്യവര്‍ഗത്തിന്റെ പ്രതിദിന ആവശ്യങ്ങള്‍ നിറവേറ്റുന്നതിനായി പ്രതിവര്‍ഷം 2500 കോടി മുതല്‍ 3000 കോടി ഡോളര്‍ വരെ വിലമതിക്കുന്ന മാംസ-ക്ഷീര ഉല്‍പ്പന്നങ്ങളാണ് ചൈന ഇറക്കുമതി ചെയ്യുന്നത്. കന്നുകാലികളുടെ ജനിതക ശേഷി വര്‍ദ്ധിപ്പിക്കുന്നതിലൂടെ തീറ്റച്ചെലവ് കുറയ്ക്കാനും വേഗത്തില്‍ മാംസവും പാലുത്പാദനവും വര്‍ദ്ധിപ്പിക്കാനും സാധിക്കും. മുന്‍പ് കടുത്ത നിയന്ത്രണങ്ങള്‍ നിലനിന്നിരുന്നെങ്കിലും, നിലവില്‍ ഓസ്ട്രേലിയയില്‍ നിന്നും കാനഡയില്‍ നിന്നുമുള്ള ഉല്‍പ്പന്നങ്ങള്‍ ചൈനയില്‍ എത്തുവാന്‍ തുടങ്ങിയിട്ടുണ്ട്. താമസിയാതെ അമേരിക്ക, ബ്രിട്ടന്‍ എന്നീ രാജ്യങ്ങളില്‍ നിന്നുള്ള ഇറക്കുമതിക്കും ചൈന പച്ചക്കൊടി കാട്ടുമെന്നാണ് പ്രതീക്ഷിക്കുന്നത്.