ടോളിഡോ: സ്പെയ്നിലെ ടോളിഡോയ്ക്ക് സമീപം രണ്ട് അതിവേഗ ട്രെയിനുകള്‍ കൂട്ടിയിടിച്ച് വന്‍ ദുരന്തം. അപകടത്തില്‍ കുറഞ്ഞത് 30 പേര്‍ മരിച്ചതായി കസ്റ്റീലാ ലാ മാഞ്ച റീജിയണല്‍ സര്‍ക്കാര്‍ സ്ഥിരീകരിച്ചു. മഡ്രിഡിനെയും തെക്കന്‍ ആന്തലൂസിയന്‍ മേഖലയെയും ബന്ധിപ്പിക്കുന്ന പ്രധാന റെയില്‍ പാതയിലാണ് അപകടം നടന്നത്. ദുരന്തത്തെ തുടര്‍ന്ന് ഈ വഴിയുള്ള റെയില്‍ സര്‍വീസുകള്‍ പൂര്‍ണ്ണമായി നിര്‍ത്തിവെച്ചതായി റെയില്‍ ഓപ്പറേറ്ററായ 'അഡിഫ്' അറിയിച്ചു.
പ്രാദേശിക സമയം രാവിലെ 9 മണിയോടെയാണ് അപകടമുണ്ടായത്. കൂട്ടിയിടിയുടെ ആഘാതത്തില്‍ ട്രെയിനിന്റെ രണ്ട് ബോഗികള്‍ പാളം തെറ്റി മറഞ്ഞു. അപകടത്തിന്റെ കാരണം വ്യക്തമല്ലെന്നും മരണസംഖ്യയും പരിക്കേറ്റവരുടെ വിവരങ്ങളും ശേഖരിച്ചു വരികയാണെന്നും അധികൃതര്‍ വ്യക്തമാക്കി.
റെയില്‍വേ ബോഗികളുടെ ജനലുകളും വാതിലുകളും തകര്‍ത്താണ് രക്ഷാപ്രവര്‍ത്തകരും മറ്റ് യാത്രക്കാരും ചേര്‍ന്ന് ആളുകളെ പുറത്തെത്തിച്ചത്. തലനാരിഴയ്ക്ക് രക്ഷപ്പെട്ട നിരവധി യാത്രക്കാര്‍ ദാരുണമായ അനുഭവങ്ങള്‍ മാധ്യമങ്ങളുമായി പങ്കുവെച്ചു. വലിയ ശബ്ദത്തോടെയുള്ള ആഘാതമാണ് അനുഭവപ്പെട്ടതെന്നും തൊട്ടടുത്ത ബോഗികള്‍ പൂര്‍ണ്ണമായും കത്തിനശിച്ച നിലയിലായിരുന്നുവെന്നും യാത്രക്കാര്‍ സാക്ഷ്യപ്പെടുത്തുന്നു. സംഭവസ്ഥലത്ത് രക്ഷാപ്രവര്‍ത്തനം പുരോഗമിക്കുകയാണ്
