മുംബൈ: ശതകോടീശ്വരന്‍ മുകേഷ് അംബാനിയുടെ റിലയന്‍സ് ജിയോ പ്ലാറ്റ്ഫോംസിന്റെ ഓഹരികള്‍ മുംബൈ ഓഹരി വിപണിയില്‍ 21 ശതമാനം മികച്ച നേട്ടത്തോടെ ലിസ്റ്റ് ചെയ്തു. ഇതോടെ 13,150 കോടി ഡോളര്‍ (ഏകദേശം 12.5 ലക്ഷം കോടി രൂപ) വിപണി മൂല്യവുമായി ഇന്ത്യയിലെ ഏറ്റവും വലിയ രണ്ടാമത്തെ പൊതുമേഖലാ/സ്വകാര്യ കമ്പനിയായി റിലയന്‍സ് ജിയോ മാറി.
1,119 രൂപ ഓഫര്‍ വിലയുണ്ടായിരുന്ന ഓഹരി ഒന്നിന് 1,358 രൂപ നിരക്കിലാണ് വ്യാപാരം ആരംഭിച്ചത്. ലിസ്റ്റിംഗോടെ ഭാരതി എയര്‍ടെല്‍, എച്ച്.ഡി.എഫ്.സി ബാങ്ക് എന്നിവയെ മറികടന്നാണ് ജിയോ മൂല്യത്തില്‍ രണ്ടാമത് എത്തിയത്. കഴിഞ്ഞ രണ്ട് പതിറ്റാണ്ടിനിടെ റിലയന്‍സ് ഗ്രൂപ്പില്‍ നിന്നുള്ള ആദ്യത്തെ ഐ.പി.ഒ ആണിത്. ഓയില്‍-കെമിക്കല്‍ കേന്ദ്രീകൃത ഗ്രൂപ്പില്‍ നിന്ന് റിലയന്‍സിനെ സാങ്കേതികവിദ്യയും ഉപഭോക്തൃ സേവനങ്ങളും സമന്വയിപ്പിക്കുന്ന പ്രസ്ഥാനമാക്കി മാറ്റാനുള്ള അംബാനിയുടെ ലക്ഷ്യത്തിലെ പ്രധാന നാഴികക്കല്ലാണിത്.

മെറ്റാ പ്ലാറ്റ്ഫോംസ്, ഗൂഗിള്‍ എന്നിവയുടെ നിക്ഷേപമുള്ള ജിയോയ്ക്ക് നിലവില്‍ 53 കോടിയിലധികം വരിക്കാരുണ്ട്. ഒറ്റ രാജ്യത്തെ വരിക്കാരുടെ എണ്ണത്തില്‍ ചൈന മൊബൈലിന് തൊട്ടുപിന്നില്‍ രണ്ടാം സ്ഥാനത്താണ് ജിയോ. നാഷണല്‍ സ്റ്റോക്ക് എക്‌സ്‌ചേഞ്ചില്‍ നടന്ന ചടങ്ങില്‍ മുകേഷ് അംബാനി, ജിയോ മാനേജിംഗ് ഡയറക്ടറായ മകന്‍ ആകാശ് അംബാനി, നീതാ അംബാനി, ഇഷ അംബാനി, അനന്ത് അംബാനി എന്നിവര്‍ പങ്കെടുത്തു. കടുത്ത മത്സരം, വന്‍കിട മൂലധന നിക്ഷേപം, ടെലികോം ചട്ടങ്ങളിലെ മാറ്റങ്ങള്‍ എന്നിവ വെല്ലുവിളിയാണെങ്കിലും വരുംദിവസങ്ങളിലും ഓഹരി മുന്നേറുമെന്നാണ് ബ്രോക്കറേജ് സ്ഥാപനങ്ങളുടെ വിലയിരുത്തല്‍. രാജ്യത്തെ പ്രമുഖ പത്രങ്ങളില്‍ 'താങ്ക് യൂ ഇന്ത്യ' എന്ന പരസ്യത്തോടെയാണ് ജിയോ ഈ നേട്ടം ആഘോഷിച്ചത്.