റിയാദ്: റസിഡന്‍ഷ്യല്‍ മേഖലയിലെ വൈദ്യുതി ഉപഭോഗ നിരക്കുകളില്‍ വരുത്തിയ ഭേദഗതിക്ക് പിന്നാലെ, ബില്‍ തുക കണക്കാക്കുന്നത് എങ്ങനെയെന്ന് വ്യക്തമാക്കി സൗദി ഇലക്ട്രിസിറ്റി കമ്പനി. മൂന്ന് പ്രധാന ഘടകങ്ങള്‍ ഉള്‍പ്പെടുത്തിയാണ് പുതിയ ബില്‍ തുക തയ്യാറാക്കുന്നത്.



ഉപഭോഗ നിരക്ക്: പ്രതിമാസം ഉപയോഗിക്കുന്ന കിലോവാട്ട് അനുസരിച്ചുള്ള നിരക്ക്.

സ്ഥിര നിരക്ക്: സര്‍ക്യൂട്ട് ബ്രേക്കറിന്റെ ശേഷിക്ക് അനുസരിച്ചുള്ള നിശ്ചിത തുക.

മൂല്യവര്‍ദ്ധിത നികുതി: 15 ശതമാനം വാറ്റ്.

ഇവ മൂന്നും കൂട്ടിയാണ് മൊത്തം ബില്‍ തുക നിശ്ചയിക്കുന്നത്. ഉദാഹരണത്തിന്, ഒരു മാസത്തെ ഉപഭോഗം 1000 കിലോവാട്ട് ആണെങ്കില്‍, ഒരു കിലോവാട്ടിന് 0.21 ഹലാല നിരക്കില്‍ ഉപഭോഗ തുക 210 റിയാലായിരിക്കും. 30 ആംപിയര്‍ ശേഷിയുള്ള സര്‍ക്യൂട്ട് ബ്രേക്കറിന് 70 റിയാലാണ് സ്ഥിര നിരക്ക്. ഇതിനോടൊപ്പം 42 റിയാല്‍ വാറ്റും ചേരുമ്പോള്‍ ആകെ ബില്‍ തുക 322 റിയാലായി മാറും.

ബില്‍ കാലയളവ് 30 ദിവസത്തില്‍ കൂടുതലോ കുറവോ ആണെങ്കില്‍, ദിവസങ്ങളുടെ എണ്ണത്തിനനുസരിച്ചായിരിക്കും സ്ഥിര നിരക്ക് കണക്കാക്കുക. സ്ഥിര നിരക്കിന്റെ മൂല്യത്തെ ബില്‍ ദിവസങ്ങള്‍ കൊണ്ട് ഗുണിച്ച് 30 കൊണ്ട് ഹരിച്ചാണ് ഇത് കണ്ടെത്തുന്നത്.

സര്‍ക്യൂട്ട് ബ്രേക്കറിന്റെ ശേഷിയും ഉപഭോഗ വിഭാഗവും അനുസരിച്ചുള്ള നിശ്ചിത തുകയാണ് 'സ്ഥിര നിരക്ക്' എന്ന് കമ്പനി വ്യക്തമാക്കി. പ്രതിമാസ ഉപഭോഗത്തിന് ഈടാക്കുന്ന തുകയാണ് 'ഉപഭോഗ നിരക്ക്'. മുന്‍പ് ബില്ലില്‍ 'മീറ്റര്‍ സര്‍വീസ്' എന്ന പേരില്‍ നല്‍കിയിരുന്ന മീറ്റര്‍ റീഡിംഗ്, മെയിന്റനന്‍സ് എന്നിവയ്ക്കുള്ള നിരക്കിന് പകരമായാണ് പുതിയ 'സ്ഥിര നിരക്ക്' നിലവില്‍ വരുന്നത്. താരിഫ് ഭേദഗതി നടപ്പാക്കുന്ന സമയത്തെ ബില്‍ കാലയളവില്‍ പഴയ നിരക്കും പുതിയ നിരക്കും ഭാഗികമായി ഉള്‍പ്പെടുന്നുണ്ടെങ്കില്‍ മാത്രമായിരിക്കും ഇവ രണ്ടും ഒരുമിച്ച് ബില്ലില്‍ വരികയെന്നും ഇലക്ട്രിസിറ്റി കമ്പനി അറിയിച്ചു.