ന്യൂഡല്‍ഹി: നാല് സംസ്ഥാനങ്ങളിലായി നടന്ന നിയമനിര്‍മാണ കൗണ്‍സില്‍ (എം.എല്‍.സി) തിരഞ്ഞെടുപ്പില്‍ കോണ്‍ഗ്രസിന് ഒരു സീറ്റുപോലും നേടാനാകാത്തതിനെ പരിഹസിച്ച് പ്രധാനമന്ത്രി നരേന്ദ്ര മോദി. ബാലറ്റ് പേപ്പര്‍ ഉപയോഗിച്ച് തിരഞ്ഞെടുപ്പ് നടത്തിയിട്ടും കോണ്‍ഗ്രസിന് എത്ര സീറ്റുകള്‍ ലഭിച്ചുവെന്ന് ഊഹിക്കാമോ എന്നായിരുന്നു മോദിയുടെ ചോദ്യം. പരിഹാസ ഇമോജിയും ചേര്‍ത്തായിരുന്നു എക്‌സിലെ പോസ്റ്റ്.
ഉത്തര്‍പ്രദേശ്, മഹാരാഷ്ട്ര, ബിഹാര്‍, കര്‍ണാടക എന്നീ സംസ്ഥാനങ്ങളിലെ 28 സീറ്റുകളിലേക്കാണ് തിരഞ്ഞെടുപ്പ് നടന്നത്. ഇതില്‍ 12 സീറ്റുകളിലാണ് കോണ്‍ഗ്രസ് മത്സരിച്ചത്. എന്നാല്‍ ഒരു സീറ്റില്‍പ്പോലും വിജയിക്കാനായില്ല. ഇലക്ട്രോണിക് വോട്ടിങ് യന്ത്രങ്ങളുടെ വിശ്വാസ്യതയെ ചോദ്യം ചെയ്യുകയും ബാലറ്റ് പേപ്പര്‍ സംവിധാനം തിരിച്ചുകൊണ്ടുവരണമെന്ന് ആവശ്യപ്പെടുകയും ചെയ്യുന്ന കോണ്‍ഗ്രസിന്റെ നിലപാടിനെ ലക്ഷ്യമിട്ടായിരുന്നു മോദിയുടെ പരിഹാസം.
'നാല് വലിയ സംസ്ഥാനങ്ങളിലായി 28 എം.എല്‍.സി സീറ്റുകളിലേക്ക് തിരഞ്ഞെടുപ്പ് നടന്നു. ബാലറ്റ് പേപ്പര്‍ ഉപയോഗിച്ചായിരുന്നു വോട്ടെടുപ്പ്. കോണ്‍ഗ്രസ് എത്ര സീറ്റുകള്‍ നേടിയെന്ന് ഊഹിക്കാമോ?' എന്നായിരുന്നു പ്രധാനമന്ത്രിയുടെ കുറിപ്പ്.
കോണ്‍ഗ്രസ് അധികാരത്തിലുള്ള കര്‍ണാടകയിലാണ് പാര്‍ട്ടിക്ക് വലിയ തിരിച്ചടിയുണ്ടായത്. നേരത്തേ കൈവശമുണ്ടായിരുന്ന നാല് എം.എല്‍.സി സീറ്റുകളും കോണ്‍ഗ്രസിന് നഷ്ടമായി. ജനതാദള്‍ (എസ്) ഒരു സീറ്റ് പിടിച്ചെടുത്തപ്പോള്‍ ബിജെപി സഖ്യം മൂന്ന് സീറ്റുകള്‍ നേടി.
മഹാരാഷ്ട്രയില്‍ ബി.ജെ.പി നേതൃത്വം നല്‍കുന്ന മഹായുതി സഖ്യം മൂന്ന് സീറ്റുകളില്‍ മുന്നിലായിരുന്നു. പ്രതിപക്ഷമായ എന്‍സിപി (ശരദ് പവാര്‍ വിഭാഗം) രണ്ട് സീറ്റുകളില്‍ മുന്നിലെത്തി. ബിഹാറില്‍ ജന സുരാജ് പാര്‍ട്ടി അക്കൗണ്ട് തുറന്നു. ബിജെപി, ജെഡിയു, ആര്‍ജെഡി, ഒരു സ്വതന്ത്ര സ്ഥാനാര്‍ഥി എന്നിവര്‍ ഓരോ സീറ്റില്‍ വിജയിച്ചു.
ഉത്തര്‍പ്രദേശിലെ അധ്യാപകബിരുദ മണ്ഡലങ്ങളിലുള്‍പ്പെടെ വിവിധ വിഭാഗങ്ങളിലേക്കാണ് തിരഞ്ഞെടുപ്പ് നടന്നത്. അധ്യാപക മണ്ഡലങ്ങളും ബിരുദ മണ്ഡലങ്ങളും ഉള്‍പ്പെടുന്ന എം.എല്‍.സി തിരഞ്ഞെടുപ്പുകളില്‍ പരിമിതമായ വോട്ടര്‍മാരാണ് വോട്ട് രേഖപ്പെടുത്തുന്നത്.
തിരഞ്ഞെടുപ്പുകളില്‍ വോട്ടര്‍ യന്ത്രങ്ങള്‍ക്ക് പകരം ബാലറ്റ് പേപ്പര്‍ ഉപയോഗിക്കണമെന്ന ആവശ്യം കോണ്‍ഗ്രസും മറ്റ് പ്രതിപക്ഷ പാര്‍ട്ടികളും നേരത്തേ ഉന്നയിച്ചിരുന്നു. ഇവിഎമ്മുകള്‍ ബിജെപിക്ക് അനുകൂലമായി പ്രവര്‍ത്തിക്കുന്നുവെന്ന ആരോപണവും പ്രതിപക്ഷം ഉന്നയിച്ചിട്ടുണ്ട്.
എം.എല്‍.സി തിരഞ്ഞെടുപ്പിലെ ഫലം പ്രതിപക്ഷത്തിന്റെ ഇവിഎം വിമര്‍ശനങ്ങളെ ദുര്‍ബലപ്പെടുത്തുന്നതാണെന്നാണ് ബിജെപി നേതാക്കളുടെ പ്രതികരണം.