ഹൈദരാബാദ്: പശ്ചിമേഷ്യയിലെ വ്യോമാതിര്‍ത്തി നിയന്ത്രണങ്ങള്‍ തുടരുന്ന സാഹചര്യത്തില്‍ സൗദി അറേബ്യയിലെ നാല് പ്രധാന നഗരങ്ങളിലേക്കും തിരിച്ചുമുള്ള വിമാന സര്‍വീസുകള്‍ റദ്ദാക്കുന്നത് നവംബര്‍ 14 വരെ നീട്ടി ഇന്‍ഡിഗോ എയര്‍ലൈന്‍സ്. റിയാദ്, ജിദ്ദ, ദമാം, മദീന നഗരങ്ങളിലേക്കുള്ള സര്‍വീസുകളാണ് റദ്ദാക്കിയിരിക്കുന്നത്.
യാത്രാ തടസ്സം നേരിടുന്നവരെ ബന്ധപ്പെട്ട് ആവശ്യമായ വിവരങ്ങളും സഹായവും നല്‍കിവരികയാണെന്ന് കമ്പനി അറിയിച്ചു. യാത്രക്കാരുടെയും ജീവനക്കാരുടെയും സുരക്ഷയ്ക്കാണ് മുന്‍ഗണനയെന്നും മേഖലയിലെ സാഹചര്യങ്ങള്‍ സൂക്ഷ്മമായി നിരീക്ഷിച്ചുവരികയാണെന്നും ഇന്‍ഡിഗോ വ്യക്തമാക്കി.
സര്‍വീസുകളിലെ മാറ്റങ്ങളെക്കുറിച്ച് യാത്രക്കാരെ യഥാസമയം അറിയിക്കുമെന്നും നിലവിലെ പ്രതിസന്ധിയില്‍ സഹകരിക്കുന്ന യാത്രക്കാര്‍ക്ക് നന്ദി അറിയിക്കുന്നതായും കമ്പനി പറഞ്ഞു.
ഇന്‍ഡിഗോയ്ക്ക് പുറമെ ആകാശ എയറും സൗദിയിലെ ചില നഗരങ്ങളിലേക്കുള്ള സര്‍വീസുകളില്‍ നിയന്ത്രണം ഏര്‍പ്പെടുത്തിയിട്ടുണ്ട്. ഇതോടെ ഇന്ത്യയില്‍നിന്ന് സൗദിയിലേക്ക് യാത്ര ചെയ്യുന്നവരും തിരിച്ചുവരുന്നവരും ഉള്‍പ്പെടെ നിരവധി പേര്‍ക്ക് ബുദ്ധിമുട്ടുകള്‍ നേരിടേണ്ടിവരുന്നു. ഉംറ തീര്‍ഥാടകരെയും വിമാന റദ്ദാക്കല്‍ ബാധിച്ചിട്ടുണ്ട്.
യാത്ര മുടങ്ങിയവര്‍ക്കും പകരം യാത്രാസംവിധാനങ്ങള്‍ കണ്ടെത്താന്‍ പ്രയാസപ്പെടുന്നവര്‍ക്കും സഹായം നല്‍കുന്നതിനായി ജിദ്ദയിലെ ഇന്ത്യന്‍ കോണ്‍സുലേറ്റ് ഇടപെടല്‍ ശക്തമാക്കിയിട്ടുണ്ട്.
മേഖലയിലെ സുരക്ഷാ സാഹചര്യത്തെത്തുടര്‍ന്ന് ഇന്ത്യയ്ക്കും സൗദി അറേബ്യയ്ക്കുമിടയിലെ വിമാന സര്‍വീസുകളില്‍ തുടരുന്ന തടസ്സങ്ങളുടെ ഭാഗമായാണ് പുതിയ തീരുമാനം.
Related News
