റിയാദ്: സൗദി അറേബ്യയുടെ കിഴക്കന്‍ മേഖലയെ ലക്ഷ്യമാക്കി ഹൂതി തീവ്രവാദികള്‍ തൊടുത്തുവിട്ട ബാലിസ്റ്റിക് മിസൈല്‍ സൗദി വ്യോമപ്രതിരോധ സേന തകര്‍ത്തതായി സഖ്യസേനയുടെ ഔദ്യോഗിക വക്താവ് മേജര്‍ ജനറല്‍ തുര്‍ക്കി അല്‍-മാലികി അറിയിച്ചു. തായിഫിന് നേരെ കഴിഞ്ഞ ദിവസം വിക്ഷേപിച്ച ബാലിസ്റ്റിക് മിസൈലും പ്രതിരോധ സേന തകര്‍ത്തിരുന്നതായി അദ്ദേഹം ഓര്‍മ്മിപ്പിച്ചു.
ആക്രമണ ഭീഷണിയെ തുടര്‍ന്ന് കിഴക്കന്‍ മേഖലയിലും നജ്റാനിലും നാഷണല്‍ ഏര്‍ളി വാണിംഗ് പ്ലാറ്റ്ഫോം വഴി സിവില്‍ ഡിഫന്‍സ് ജാഗ്രതാ നിര്‍ദ്ദേശം നല്‍കി. എന്നാല്‍ മിനിറ്റുകള്‍ക്കകം അപകടസാധ്യത ഒഴിഞ്ഞതായി അധികൃതര്‍ അറിയിച്ചു.
മുന്നറിയിപ്പ് സമയത്ത് പൗരന്മാരും താമസക്കാരും സുരക്ഷാ മാനദണ്ഡങ്ങള്‍ കര്‍ശനമായി പാലിക്കണമെന്ന് സിവില്‍ ഡിഫന്‍സ് അഭ്യര്‍ത്ഥിച്ചു. തുറസ്സായ സ്ഥലങ്ങളില്‍ നിന്നും ജനാലകളില്‍ നിന്നും അകന്നു നില്‍ക്കുക, ബാല്‍ക്കണിയിലോ മേല്‍ക്കൂരയിലോ നില്‍ക്കരുത് എന്നിവയാണ് പ്രധാന നിര്‍ദ്ദേശങ്ങള്‍. കെട്ടിടങ്ങള്‍ക്ക് പുറത്തുള്ളവര്‍ അടുത്തുള്ള കെട്ടിടത്തിലേക്ക് മാറാനോ ഉറപ്പുള്ള തടസ്സങ്ങള്‍ക്ക് പിന്നില്‍ അഭയം പ്രാപിക്കാനോ ശ്രദ്ധിക്കണം. ആളുകള്‍ കൂട്ടംകൂടുന്നതും ചിത്രങ്ങള്‍ പകര്‍ത്തുന്നതും പൂര്‍ണ്ണമായി ഒഴിവാക്കണം.
മിസൈലുകള്‍, ഡ്രോണുകള്‍ എന്നിവ തടയുന്നതിന്റെയോ അവ പതിച്ച സ്ഥലങ്ങളുടെയോ ദൃശ്യങ്ങള്‍ പകര്‍ത്തുന്നതും പ്രചരിപ്പിക്കുന്നതും കടുത്ത കുറ്റകരമാണെന്നും ഇത്തരം നിയമലംഘനങ്ങള്‍ നടത്തുന്നവര്‍ക്കെതിരെ ശക്തമായ നിയമനടപടികള്‍ സ്വീകരിക്കുമെന്നും അധികൃതര്‍ മുന്നറിയിപ്പ് നല്‍കി.
Related News
