പാം ബീച്ച് (ഫ്‌ലോറിഡ): ഫ്‌ലോറിഡയിലെ പാം ബീച്ച് കൗണ്ടിയിലുണ്ടായ വിമാനാപകടത്തില്‍ ഒന്‍പത് പേര്‍ കൊല്ലപ്പെട്ടു. ലിയര്‍ജെറ്റ് 60 (Learjet 60) വിഭാഗത്തില്‍പ്പെട്ട ബിസിനസ് ജെറ്റാണ് ഞായറാഴ്ച ഉച്ചയ്ക്ക് 12:50-ഓടെ ഗ്രീന്‍ഏക്കേഴ്‌സിലെ ജനവാസ മേഖലയില്‍ തകര്‍ന്നുവീണത്. വിമാനത്തിലുണ്ടായിരുന്ന 9 പേരും അപകടത്തില്‍ കൊല്ലപ്പെട്ടതായി ഗതാഗത സെക്രട്ടറി ഷോണ്‍ ഡഫി സ്ഥിരീകരിച്ചു.

ടെക്‌സസിലെ ഓസ്റ്റിന്‍-ബര്‍ഗ്‌സ്‌ട്രോം അന്താരാഷ്ട്ര വിമാനത്താവളത്തില്‍ നിന്ന് ബഹാമസിലെ നോര്‍ത്ത് എലൂഥെറ വിമാനത്താവളത്തിലേക്ക് പുറപ്പെട്ട വിമാനമാണ് അപകടത്തില്‍പ്പെട്ടതെന്ന് ഫെഡറല്‍ ഏവിയേഷന്‍ അഡ്മിനിസ്‌ട്രേഷന്‍ (FAA) അറിയിച്ചു. സംഭവത്തില്‍ ദേശീയ ഗതാഗത സുരക്ഷാ ബോര്‍ഡിന്റെ നേതൃത്വത്തില്‍ അന്വേഷണം ആരംഭിച്ചിട്ടുണ്ട്.

അപകടത്തെത്തുടര്‍ന്ന് വന്‍ തീപിടുത്തവും നാശനഷ്ടങ്ങളുമാണ് പ്രദേശത്തുണ്ടായത്. വിമാനം നിലത്തുപതിച്ച ഭാഗത്ത് വന്‍ ഗര്‍ത്തം രൂപപ്പെട്ടിട്ടുണ്ട്. വന്‍ ശബ്ദത്തോടെ വിമാനം തകര്‍ന്നുവീണത് സമീപവാസികളില്‍ കടുത്ത ഭീതി പടര്‍ത്തി. പ്രദേശത്ത് വീടുകള്‍ക്കും മറ്റും കേടുപാടുകള്‍ സംഭവിക്കുകയും റോഡില്‍ തീപടരുകയും ചെയ്തു.

അപകടത്തിന് പിന്നാലെ പരിഭ്രാന്തരായ നൂറുകണക്കിന് ആളുകളെ സുരക്ഷിത സ്ഥാനങ്ങളിലേക്ക് മാറ്റിപ്പാര്‍പ്പിച്ചു. സമീപത്തെ മൊബൈല്‍ ഹോം പാര്‍ക്കില്‍ നിന്നടക്കം 600-ഓളം ആളുകള്‍ക്ക് താല്‍ക്കാലികമായി പുനരധിവാസം ഒരുക്കിയിട്ടുണ്ടെന്ന് ഡിസ്ട്രിക്റ്റ് 3 കമ്മീഷണര്‍ ജോയല്‍ ഫ്‌ലോറസ് അറിയിച്ചു. റെഡ് ക്രോസിന്റെ സഹായത്തോടെ പ്രദേശവാസികള്‍ക്ക് ആവശ്യമായ സഹായങ്ങള്‍ നല്‍കിവരികയാണ്. നിലത്തുണ്ടായിരുന്ന ആര്‍ക്കെങ്കിലും പരിക്കേറ്റിട്ടുണ്ടോ എന്നതില്‍ വ്യക്തത വന്നിട്ടില്ല.