​

​ആലുവ: ആലുവ ഇസ്ലാമിക് ഹയർ സെക്കൻഡറി സ്കൂൾ എൻ.എസ്.എസ് യൂണിറ്റും രാജഗിരി ആശുപത്രിയും സംയുക്തമായി രക്തദാന ക്യാമ്പ് സംഘടിപ്പിച്ചു. ഒക്ടോബർ 31 ശനിയാഴ്ച രാവിലെ 9.30-ന് സ്കൂൾ മാനേജർ അഡ്വ. അനീസ് ഫാഹിദ് ക്യാമ്പ് ഉദ്ഘാടനം ചെയ്തു.
​ഉദ്ഘാടനത്തിന് പിന്നാലെ അഡ്വ. അനീസ് ഫാഹിദ് രക്തം ദാനം ചെയ്ത് ക്യാമ്പിന് തുടക്കം കുറിച്ചു. രാജഗിരി ആശുപത്രി കൗൺസിലർ ജെലിൻ രക്തദാനത്തിന്റെ പ്രാധാന്യത്തെക്കുറിച്ച് സംസാരിച്ചു.
​സ്കൂൾ പ്രിൻസിപ്പൽ അപർണ ഭാസി, ഹെഡ്മിസ്ട്രസ് ഹസീന ബീഗം, സ്കൂൾ ബോർഡ് അംഗം നാദിർഷ എന്നിവർ ചടങ്ങിൽ പങ്കെടുത്തു. എൻ.എസ്.എസ് പ്രോഗ്രാം ഓഫീസർ സൂര്യ സ്വാഗതം ആശംസിച്ചു.
​പതിനെട്ട് വയസ്സ് പൂർത്തിയായ എൻ.എസ്.എസ് വളണ്ടിയർമാർ ഉൾപ്പെടെ ആകെ 42 പേർ ക്യാമ്പിൽ രക്തം ദാനം ചെയ്തു. രക്തദാനത്തിന്റെ മഹത്വം വിദ്യാർത്ഥികളിലേക്ക് എത്തിക്കാനും സാമൂഹിക സേവനത്തിന്റെ സന്ദേശം പകരാനും ക്യാമ്പ് സഹായകമായി.