വാഷിംഗ്ടണ്‍: അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ രണ്ടാം ഊഴത്തിലെ ആദ്യ രണ്ടു വര്‍ഷത്തെ ഭരണത്തിന്മേല്‍ ജനങ്ങള്‍ നല്‍കുന്ന ജനവിധിക്ക് നാളെ രാജ്യത്തിലുടനീളം വോട്ടെടുപ്പ് നടക്കും. അമേരിക്കന്‍ ഇടക്കാല തെരഞ്ഞെടുപ്പില്‍ പ്രതിനിധി സഭ ഡെമോക്രാറ്റുകള്‍ പിടിച്ചെടുക്കുമെന്നാണ് സര്‍വേകളും രാഷ്ട്രീയ നിരീക്ഷകരും പ്രവചിക്കുന്നത്. എന്നാല്‍ പത്തോളം സംസ്ഥാനങ്ങളില്‍ നടക്കുന്ന കടുത്ത പോരാട്ടങ്ങളിലൂടെ സെനറ്റിന്റെ നിയന്ത്രണം ആര്‍ക്കൊപ്പം നില്‍ക്കുമെന്ന കാര്യം പ്രവചനാതീതമായി തുടരുന്നു.
രണ്ടാം ലോകമഹായുദ്ധത്തിന് ശേഷമുള്ള ചരിത്രം പരിശോധിച്ചാല്‍, അധികാരത്തിലിരിക്കുന്ന പ്രസിഡന്റിന്റെ പാര്‍ട്ടിക്ക് കോണ്‍ഗ്രസില്‍ തിരിച്ചടി നേരിടേണ്ടി വന്ന അനുഭവമാണ് അധികവും. ഇറാനുമായുള്ള യുദ്ധവും തുടര്‍ന്നുണ്ടായ ഇന്ധനവിലക്കയറ്റവും സൃഷ്ടിച്ച ജനരോഷം കാരണം ട്രംപിന്റെ ജനപ്രീതി എക്കാലത്തെയും താഴ്ന്ന നിലവാരത്തിലാണ്. ഈ തെരഞ്ഞെടുപ്പ് പൂര്‍ണ്ണമായും ട്രംപിന്റെ ഭരണത്തിനുള്ള ഒരു റഫറണ്ടമായി മാറിയിരിക്കുകയാണ്. കഴിഞ്ഞ മാസങ്ങളില്‍ റിപ്പബ്ലിക്കന്‍ ശക്തികേന്ദ്രങ്ങളില്‍ മാത്രം ട്രംപ് തരംഗം സൃഷ്ടിക്കാന്‍ ഇരുപതിലേറെ വന്‍ പ്രചാരണ റാലികള്‍ നടത്തിയിട്ടും പാര്‍ട്ടി പ്രതിരോധത്തിലാണെന്ന സൂചനകളാണ് പുറത്തുവരുന്നത്.
സഭകളിലെ ഭൂരിപക്ഷ സമവാക്യങ്ങള്‍:
പ്രതിനിധി സഭ: ആകെയുള്ള 435 സീറ്റുകളിലേക്കും തെരഞ്ഞെടുപ്പ് നടക്കുന്നു. ഭൂരിപക്ഷം നേടാന്‍ ഡെമോക്രാറ്റുകള്‍ക്ക് ചുരുങ്ങിയത് 3 റിപ്പബ്ലിക്കന്‍ സീറ്റുകള്‍ എങ്കിലും പിടിച്ചെടുക്കണം. ഇതില്‍ 47 സീറ്റുകളില്‍ കടുത്ത മത്സരമാണ് നടക്കുന്നത്.
സെനറ്റ്: ആകെയുള്ള 100 സീറ്റുകളില്‍ 35 എണ്ണത്തിലേക്കാണ് ഇത്തവണ തെരഞ്ഞെടുപ്പ്. ഇവിടെ ഭൂരിപക്ഷം ഉറപ്പാക്കാന്‍ ഡെമോക്രാറ്റുകള്‍ക്ക് 4 പുതിയ സീറ്റുകള്‍ പിടിച്ചെടുക്കേണ്ടതുണ്ട്.
സെനറ്റോ പ്രതിനിധി സഭയോ ഡെമോക്രാറ്റുകളുടെ കൈകളിലെത്തിയാല്‍, ട്രംപ് ഭരണകൂടത്തിനെതിരായ അന്വേഷണങ്ങള്‍ ശക്തമാക്കാനും ഭാവിയിലെ നിയമനിര്‍മ്മാണങ്ങളിലും സുപ്രീം കോടതി ജഡ്ജിമാരുടെ നിയമനങ്ങളിലും കടുത്ത നിയന്ത്രണങ്ങള്‍ ഏര്‍പ്പെടുത്താനും അവര്‍ക്ക് സാധിക്കും.
ശ്രദ്ധേയമായ സെനറ്റ് പോരാട്ടങ്ങള്‍:
മിഷിഗണ്‍: പുരോഗമനവാദിയായ ഡെമോക്രാറ്റ് സ്ഥാനാര്‍ത്ഥി അബ്ദുള്‍ എല്‍-സയീദും റിപ്പബ്ലിക്കന്‍ പ്രതിനിധി മൈക്ക് റോജേഴ്‌സും തമ്മിലാണ് പോരാട്ടം. ഡെമോക്രാറ്റിക് പ്രൈമറിയില്‍ നേരിയ വ്യത്യാസത്തിന് തോറ്റ ഹേലി സ്റ്റീവന്‍സ് അപ്രതീക്ഷിതമായി റിപ്പബ്ലിക്കന്‍ സ്ഥാനാര്‍ത്ഥിക്ക് പിന്തുണ പ്രഖ്യാപിച്ചത് ഇവിടെ ഡെമോക്രാറ്റുകള്‍ക്ക് തിരിച്ചടിയായിട്ടുണ്ട്. ജയിച്ചാല്‍ അമേരിക്കന്‍ ചരിത്രത്തിലെ ആദ്യ മുസ്ലിം സെനറ്ററാകും എല്‍-സയീദ്.
ടെക്‌സസ്: റിപ്പബ്ലിക്കന്‍ കോട്ടയായ ടെക്‌സസില്‍ ഡെമോക്രാറ്റ് സ്ഥാനാര്‍ത്ഥി ജെയിംസ് തലരികോയിലൂടെ അട്ടിമറി വിജയമാണ് പാര്‍ട്ടി പ്രതീക്ഷിക്കുന്നത്. ലോകത്തെ ഏറ്റവും വലിയ കോടീശ്വരനായ ഈലോണ്‍ മസ്‌ക് തന്റെ എതിര്‍ സ്ഥാനാര്‍ത്ഥിയായ റിപ്പബ്ലിക്കന്‍ അറ്റോര്‍ണി ജനറല്‍ കെന്‍ പാക്സ്റ്റനായി കോടിക്കണക്കിന് ഡോളറാണ് പ്രചാരണത്തിനായി ഒഴുക്കുന്നത്.
അലാസ്‌ക: ഡെമോക്രാറ്റ് സ്ഥാനാര്‍ത്ഥി മേരി പെല്‍ട്ടോളയുടെ പ്രചാരണ സംഘം, റിപ്പബ്ലിക്കന്‍ സ്ഥാനാര്‍ത്ഥി ഡാന്‍ സുള്ളിവന്റെ അതേ പേരുള്ള മറ്റൊരു മൂന്നാം സ്ഥാനാര്‍ത്ഥിയെ മത്സരരംഗത്തിറക്കി വോട്ടര്‍മാരെ ആശയക്കുഴപ്പത്തിലാക്കാന്‍ ശ്രമിച്ചെന്ന ആരോപണം വലിയ രാഷ്ട്രീയ വിവാദമായിട്ടുണ്ട്.
മറ്റ് സംസ്ഥാനങ്ങള്‍: കന്‍സാസ്, മെയ്ന്‍, ഐയോവ, നെബ്രാസ്‌ക, ഒഹായോ, സൗത്ത് കരോളിന എന്നീ റിപ്പബ്ലിക്കന്‍ മുന്‍തൂക്കമുള്ള സംസ്ഥാനങ്ങളിലും ശക്തമായ പോരാട്ടമാണ് നടക്കുന്നത്.
തെരഞ്ഞെടുപ്പ് തോറ്റാല്‍ ട്രംപ് ഫലങ്ങള്‍ ചോദ്യം ചെയ്‌തേക്കാമെന്ന ഭീതി നിലനില്‍ക്കുന്നതിനിടെ, തെരഞ്ഞെടുപ്പ് പ്രക്രിയകളില്‍ സര്‍ക്കാരിന്റെ ഇടപെടലുകള്‍ തര്‍ക്കങ്ങള്‍ക്ക് വഴിവെച്ചിട്ടുണ്ട്. അലാസ്‌കയിലെ ആരോപണങ്ങളില്‍ നീതിന്യായ വകുപ്പ് ക്രിമിനല്‍ അന്വേഷണം ആരംഭിച്ചപ്പോള്‍, കാലിഫോര്‍ണിയയിലെ ചില വോട്ടുകള്‍ അസാധുവാക്കണമെന്നാവശ്യപ്പെട്ട് ട്രംപിന്റെ നീതിന്യായ വകുപ്പ് സമര്‍പ്പിച്ച അടിയന്തര ഹരജി അമേരിക്കന്‍ സുപ്രീം കോടതി കഴിഞ്ഞ ദിവസം തള്ളി.
സെനറ്റ്, ജനപ്രതിനിധി സഭാ തെരഞ്ഞെടുപ്പുകള്‍ക്ക് പുറമേ 36 സംസ്ഥാനങ്ങളില്‍ ഗവര്‍ണര്‍ തെരഞ്ഞെടുപ്പും പ്രാദേശിക നിയമസഭാ തെരഞ്ഞെടുപ്പുകളും അബോര്‍ഷന്‍ അവകാശം, കോടീശ്വരന്മാരുടെ നികുതി തുടങ്ങിയ വിഷയങ്ങളിലുള്ള വോട്ടെടുപ്പുകളും നാളെ നടക്കും. ട്രംപിന്റെ രാഷ്ട്രീയ ഭാവിയും അമേരിക്കന്‍ ഭരണകൂടത്തിന്റെ ദിശയും നിര്‍ണ്ണയിക്കുന്ന നിര്‍ണ്ണായക വിധി എഴുത്തിനായി ലോകം മുഴുവന്‍ ഉറ്റുനോക്കുകയാണ്.
Related News
