ഫുജൈറ: ഫുജൈറ-ഖോര്‍ഫക്കന്‍ റോഡില്‍ നിര്‍ത്തിയിട്ടിരുന്ന ട്രക്കില്‍ ബൈക്കിടിച്ച് ഏഷ്യക്കാരനായ ഫുഡ് ഡെലിവറി റൈഡര്‍ മരിച്ചു. ഫൗസ് മേഖലയ്ക്ക് സമീപം ഒക്ടോബര്‍ 30 വെള്ളിയാഴ്ച രാവിലെ 8:05 നായിരുന്നു അപകടം. ഈ വര്‍ഷം ഫുജൈറയിലുണ്ടാകുന്ന അഞ്ചാമത്തെ റോഡപകട മരണമാണിത്.
അപകടവിവരം അറിഞ്ഞയുടന്‍ പോലീസും ആംബുലന്‍സ് സംഘവും സംഭവസ്ഥലത്തെത്തി റൈഡറെ ഫുജൈറയിലെ ഷെയ്ഖ് ഖലീഫ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. അപകടത്തിന്റെ കാരണങ്ങളെക്കുറിച്ച് ഫുജൈറ പോലീസ് അന്വേഷണം ആരംഭിച്ചിട്ടുണ്ട്.
ഡ്രൈവര്‍മാര്‍ക്ക് ജാഗ്രതാ നിര്‍ദ്ദേശം നല്‍കി പോലീസ്
പ്രധാന റോഡുകളില്‍ ട്രക്കുകളും മറ്റ് വലിയ വാഹനങ്ങളും നിര്‍ത്തിയിടുന്നത് മറ്റ് വാഹനങ്ങള്‍ക്ക് വലിയ ഭീഷണിയാണെന്ന് ഫുജൈറ പോലീസ് ട്രാഫിക് ആന്‍ഡ് പട്രോള്‍സ് ഡിപ്പാര്‍ട്ട്‌മെന്റ് ഡയറക്ടര്‍ ബ്രിഗേഡിയര്‍ സ്വാലിഹ് മുഹമ്മദ് അബ്ദുള്ള അല്‍ ധന്‍ഹാനി മുന്നറിയിപ്പ് നല്‍കി. ഡ്രൈവര്‍മാര്‍ റോഡിലെ സാഹചര്യങ്ങളില്‍ നിരന്തരം ശ്രദ്ധ പുലര്‍ത്തണമെന്നും, നിര്‍ത്തിയിട്ടിരിക്കുന്ന വാഹനങ്ങളെ സമീപിക്കുമ്പോള്‍ വേഗം കുറയ്ക്കുകയും സുരക്ഷിതമായ അകലം പാലിക്കുകയും വേണമെന്നും അദ്ദേഹം ഓര്‍മ്മിപ്പിച്ചു.
ഡ്രൈവിംഗിനിടയിലെ മൊബൈല്‍ ഫോണ്‍ ഉപയോഗം, പെട്ടെന്നുള്ള വരി മാറ്റല്‍ എന്നിവ അപകടങ്ങള്‍ക്ക് കാരണമാകുന്നുണ്ട്. കഴിഞ്ഞ ദിവസം ഫുജൈറയില്‍ ഇലക്ട്രിക് സ്‌കൂട്ടറില്‍ യാത്ര ചെയ്യുകയായിരുന്ന 24 കാരനായ ഇന്ത്യന്‍ യുവാവ് എസ്.യു.വി ഇടിച്ചു മരിച്ച സംഭവത്തിന് പിന്നാലെയാണ് ഈ പുതിയ അപകടവും ഉണ്ടായത്.
ഫുജൈറ പോലീസും മുനിസിപ്പാലിറ്റിയും ചേര്‍ന്ന് ഫുഡ് ഡെലിവറി റൈഡര്‍മാര്‍ക്കായി മുന്‍പ് പ്രത്യേക ട്രാഫിക് ബോധവല്‍ക്കരണ പരിപാടികള്‍ സംഘടിപ്പിച്ചിരുന്നു. അമിതവേഗം, അപകടകരമായ രീതിയിലുള്ള ഓവര്‍ടേക്കിംഗ്, ഹെല്‍മറ്റ് ധരിക്കാതെയുള്ള യാത്ര എന്നിവ ഒഴിവാക്കാനും ട്രാഫിക് നിയമങ്ങള്‍ കര്‍ശനമായി പാലിക്കാനും പോലീസ് നിരന്തരം നിര്‍ദ്ദേശം നല്‍കിവരുന്നുണ്ട്. ഇതിനായി മേഖലയില്‍ പരിശോധനകളും ശക്തമാക്കിയിട്ടുണ്ട്.
Related News
