റിയാദ്: നാഷണല്‍ ഫാല്‍ക്കണ്‍ സെന്റര്‍ സംഘടിപ്പിക്കുന്ന 2026-ലെ ഫാല്‍ക്കണ്‍ ലേലത്തിന്റെ 16-ാം രാത്രിയില്‍ മൂന്ന് ഷാഹീന്‍ ഫാല്‍ക്കണുകള്‍ ആകെ 3,19,000 സൗദി റിയാലിന് വിറ്റഴിഞ്ഞു. ഫാല്‍ക്കണ്‍ പ്രേമികളുടെയും പരമ്പരാഗത പൈതൃക ആസ്വാദകരുടെയും വലിയ പങ്കാളിത്തത്തോടെയായിരുന്നു ലേല നടപടികള്‍ നടന്നത്.

ലേലത്തില്‍ ഏറ്റവും ഉയര്‍ന്ന വില ലഭിച്ചത് ഹസ്മ് അല്‍-ജലാമീദിന് തെക്കുള്ള അല്‍-അംഹാസില്‍ നിന്ന് പിടിച്ച ഷാഹീന്‍ ഫാല്‍ക്കണിനാണ്. 1,53,000 റിയാലിനാണ് ഇത് വിറ്റുപോയത്. റഫ്ഹായില്‍നിന്ന് പിടിയിലായ ഫാല്‍ക്കണ്‍ 86,000 റിയാലിനും വാദി അല്‍-അജ്മാനിലെ ഹനീതില്‍നിന്ന് ലഭിച്ച ഫാല്‍ക്കണ്‍ 80,000 റിയാലിനും ലേലത്തില്‍ വിറ്റഴിഞ്ഞു.

പൈതൃക കായിക വിനോദമായ വേട്ടപ്പക്ഷികളുടെ പ്രജനനവും സുസ്ഥിരതയും സംരക്ഷിക്കുന്നതിന്റെ ഭാഗമായി നാഷണല്‍ ഫാല്‍ക്കണറി സെന്റര്‍ സംഘടിപ്പിക്കുന്ന ഈ ലേലം നവംബര്‍ അവസാനം വരെ തുടരും. രാജ്യത്തിന്റെ വിവിധ ഭാഗങ്ങളില്‍നിന്നുള്ള പ്രായം കുറഞ്ഞ ദേശാടന ഷാഹീന്‍ ഫാല്‍ക്കണുകളെ ലേലത്തില്‍ സ്വീകരിക്കുന്നുണ്ട്. ഫാല്‍ക്കണ്‍ ഉടമകള്‍ക്ക് ആവശ്യമായ താമസ, ഗതാഗത സൗകര്യങ്ങള്‍ ഉള്‍പ്പെടെയുള്ള എല്ലാ സേവനങ്ങളും സെന്റര്‍ ലഭ്യമാക്കുന്നുണ്ട്. ലേല നടപടികള്‍ ടെലിവിഷന്‍ ചാനലുകളിലൂടെയും സോഷ്യല്‍ മീഡിയ പ്ലാറ്റ്ഫോമുകളിലൂടെയും തത്സമയം സംപ്രേഷണം ചെയ്തു വരുന്നു.