റിയാദ്: സൗദി അറേബ്യയില്‍ നടക്കാനിരിക്കുന്ന 2027-ലെ ഏഷ്യന്‍ ഫുട്‌ബോള്‍ കോണ്‍ഫെഡറേഷന്‍ ഏഷ്യന്‍ കപ്പിന്റെ മത്സര തീയതികള്‍ മാറ്റിവെച്ചതായി എ.എഫ്.സി പ്രഖ്യാപിച്ചു. 2027 ജനുവരി 7 മുതല്‍ ഫെബ്രുവരി 5 വരെ നടക്കാനിരുന്ന മത്സരങ്ങള്‍ 2027 ഡിസംബര്‍ 23 മുതല്‍ 2028 ജനുവരി 21 വരെയായിരിക്കും നടക്കുക. ഹൂത്തി ആക്രമണങ്ങള്‍മൂലംമുള്ള സാഹചര്യങ്ങളാണ് തീയതി മാറ്റുന്നതിന് കാരണം എന്നാണ് കരുതുന്നത്.

സൗദി അറേബ്യന്‍ ഫുട്‌ബോള്‍ ഫെഡറേഷന്‍, പ്രാദേശിക സംഘാടക സമിതി എന്നിവരുമായി നടത്തിയ ചര്‍ച്ചകള്‍ക്കും ലോജിസ്റ്റിക് ക്രമീകരണങ്ങള്‍ വിലയിരുത്തിയതിനും ശേഷമാണ് തീയതി മാറ്റാന്‍ തീരുമാനിച്ചതെന്ന് എ.എഫ്.സി വാര്‍ത്താക്കുറിപ്പില്‍ അറിയിച്ചു. മത്സരിക്കുന്ന ടീമുകള്‍ക്കും കാണികള്‍ക്കും മികച്ച അന്തരീക്ഷവും വേറിട്ട അനുഭവവും ഉറപ്പാക്കുകയാണ് ഈ തീരുമാനത്തിലൂടെ ലക്ഷ്യമിടുന്നത്. ലോകോത്തര രീതിയില്‍ ടൂര്‍ണമെന്റ് സംഘടിപ്പിക്കാനുള്ള സൗദിയുടെ സജ്ജതയെയും പ്രതിജ്ഞാബദ്ധതയെയും എ.എഫ്.സി പ്രശംസിച്ചു.

മത്സര തീയതി മാറ്റിയെങ്കിലും ടൂര്‍ണമെന്റിനായുള്ള ഒരുക്കങ്ങള്‍ പൂര്‍ണ്ണ സജ്ജമാണെന്ന് ഏഷ്യന്‍ കപ്പ് പ്രാദേശിക സംഘാടക സമിതി ചെയര്‍മാന്‍ യാസിര്‍ ബിന്‍ ഹസ്സന്‍ അല്‍-മിഷാല്‍ വ്യക്തമാക്കി. ജനുവരിയില്‍ നടക്കേണ്ടിയിരുന്ന ടൂര്‍ണമെന്റിനായുള്ള എല്ലാ പ്ലാനുകളും മുന്‍കൂട്ടി തയ്യാറാക്കിയിരുന്നുവെന്നും, പുതിയ തീയതിയായ 2027 ഡിസംബര്‍ വരെ അതേ ആവേശത്തോടെ തന്നെ പ്രവര്‍ത്തനങ്ങള്‍ തുടരുമെന്നും സൗദി പ്രസ് ഏജന്‍സിയോട് സംസാരിക്കവെ അദ്ദേഹം പറഞ്ഞു.

ഏഷ്യന്‍ ഫുട്‌ബോള്‍ കോണ്‍ഫെഡറേഷനുമായും മറ്റ് പങ്കാളികളുമായും ചേര്‍ന്ന് പ്രവര്‍ത്തിച്ച് സൗദിയുടെ കായിക മികവിന് അനുയോജ്യമായ രീതിയില്‍ അവിസ്മരണീയമായ ഒരു ഏഷ്യന്‍ കപ്പ് പതിപ്പ് ലോകത്തിന് സമ്മാനിക്കുമെന്നും സംഘാടക സമിതി ഉറപ്പുനല്‍കി.

സൗദിയില്‍ നടക്കാനിരുന്ന പല അന്താരാഷ്ട്ര പരിപാടികളും ഹൂത്തി ഭീഷണിമൂലം മാറ്റിയിട്ടുണ്ട്. ഒക്ടോബറില്‍ നടക്കേണ്ടിയിരുന്ന ഗ്ലോബല്‍ ഹെല്‍ത് എക്‌സിബിഷനും ഡിസംബറില്‍ നടക്കേണ്ട റെഡ് സീ ഫിലിം ഫെസ്റ്റിവലും മാറ്റിവെച്ചവയില്‍ ഉള്‍പ്പെടുന്നു.