റിയാദ്: ഇന്ദിരാഗാന്ധിയുടെ ജീവിതവും രാഷ്ട്രീയ സംഭാവനകളും പ്രമേയമാക്കി ഒ.ഐ.സി.സി. റിയാദ് സെന്‍ട്രല്‍ കമ്മിറ്റി പ്രസംഗമത്സരം സംഘടിപ്പിച്ചു. ഇന്ദിരാഗാന്ധി രക്തസാക്ഷി ദിനാചരണത്തിന്റെ ഭാഗമായി ബത്ഹയിലെ സബര്‍മതി ഓഫീസില്‍ നടന്ന മത്സരത്തില്‍ വിവിധ ജില്ലാ കമ്മിറ്റികളില്‍ നിന്നുള്ള മത്സരാര്‍ഥികള്‍ പങ്കെടുത്തു.
എറണാകുളം ജില്ലയില്‍ നിന്നുള്ള റിജോ ഡൊമിനിക്കോസ് ഒന്നാം സ്ഥാനവും ലാലു വര്‍ക്കി രണ്ടാം സ്ഥാനവും നേടി. കോഴിക്കോട് ജില്ലയില്‍ നിന്നുള്ള ഹാറൂണ്‍ റഷീദും മലപ്പുറം ജില്ലയില്‍ നിന്നുള്ള മുഹമ്മദ് കല്ലിങ്ങലും മൂന്നാം സ്ഥാനം പങ്കിട്ടു.
ഇന്ദിരാഗാന്ധിയുടെ ജീവിതം, രാഷ്ട്രീയ പ്രവര്‍ത്തനം, രാജ്യപുരോഗതിക്ക് നല്‍കിയ സംഭാവനകള്‍, ഇന്ത്യന്‍ രാഷ്ട്രീയ ചരിത്രത്തിലെ അവരുടെ സ്ഥാനം എന്നിവ ആസ്പദമാക്കിയാണ് മത്സരാര്‍ഥികള്‍ പ്രസംഗങ്ങള്‍ അവതരിപ്പിച്ചത്.
നസറുദ്ദീന്‍ വി.ജെ., അഡ്വ. എല്‍.കെ. അജിത്ത്, നാദിര്‍ഷാ റഹ്‌മാന്‍, നൗഫല്‍ പാലക്കാടന്‍ എന്നിവരായിരുന്നു വിധികര്‍ത്താക്കള്‍. പ്രസംഗങ്ങളുടെ ഉള്ളടക്കം, അവതരണശൈലി, വ്യക്തത, വിഷയത്തോടുള്ള സമീപനം എന്നിവ വിലയിരുത്തിയാണ് വിജയികളെ തിരഞ്ഞെടുത്തത്. മത്സരാര്‍ഥികളെല്ലാം മികച്ച പ്രകടനം കാഴ്ചവെച്ചതിനാല്‍ വിജയികളെ നിര്‍ണയിക്കുക പ്രയാസകരമായിരുന്നുവെന്ന് വിധികര്‍ത്താക്കള്‍ അഭിപ്രായപ്പെട്ടു.
റിയാസ് ആസാദ്, റഫീഖ് പട്ടാമ്പി, നിഹാസ് പാലക്കാട്, റസാഖ് ചാവക്കാട്, അജ്‌നാസ്, അഷ്‌റഫ് കായംകുളം, നിയാഫ് വലിയത്ത്, മുജീബ് ചാവക്കാട്, രാജീവ് സാഹിബ് എന്നിവരുടെ പ്രകടനങ്ങളെയും ജൂറി പ്രത്യേകം അഭിനന്ദിച്ചു.
ഒ.ഐ.സി.സി. റിയാദ് സെന്‍ട്രല്‍ കമ്മിറ്റി ഭാരവാഹികളായ സലീം കളക്കര, ഷംനാദ് കരുനാഗപ്പള്ളി, അമീര്‍ പട്ടണത്ത്, ബാലുകുട്ടന്‍, സക്കീര്‍ ദാനത്ത്, സുരേഷ് ശങ്കര്‍, അഷ്‌റഫ് മേച്ചേരി എന്നിവര്‍ ചടങ്ങില്‍ സംബന്ധിച്ചു.
ഇന്ദിരാഗാന്ധിയുടെ ജീവിതവും സംഭാവനകളും പുതുതലമുറയ്ക്ക് പരിചയപ്പെടുത്താനും പ്രവാസി സമൂഹത്തില്‍ അവ ചര്‍ച്ച ചെയ്യാനും ഇത്തരം പരിപാടികള്‍ സഹായിക്കുമെന്ന് സംഘാടകര്‍ പറഞ്ഞു.
Related News
