ഷാര്‍ജ: യു.എ.ഇയിലെ ഷാര്‍ജയിലുണ്ടായ വാഹനാപകടത്തില്‍ രണ്ട് മലയാളി യുവാക്കള്‍ മരിച്ചു. ഒരാള്‍ക്ക് ഗുരുതരമായി പരിക്കേറ്റു. കോഴിക്കോട് നന്മണ്ട കൂളിപ്പൊയില്‍ തണ്ടിക്കുന്നുമ്മല്‍ രമീഷ്‌കുമാര്‍ (40), പാലക്കാട് ഒറ്റപ്പാലം അമ്പലപ്പാറ ചെറുമുണ്ടശ്ശേരി സ്വദേശി ഷാരിഖ് (25) എന്നിവരാണ് മരിച്ചത്. അപകടത്തില്‍ ഗുരുതരമായി പരിക്കേറ്റ ആലപ്പുഴ സ്വദേശി അജ്മലിനെ ഉമ്മുല്‍ഖുവൈന്‍ ആശുപത്രിയില്‍ പ്രവേശിപ്പിച്ചു.
ചൊവ്വാഴ്ച രാത്രി എമിറേറ്റ്സ് റോഡില്‍ ഷാര്‍ജ മസ്ജിദിന് സമീപമായിരുന്നു അപകടം. ഉമ്മുല്‍ഖുവൈനിലെ പ്രമുഖ കാറ്ററിംഗ് സ്ഥാപനത്തിലെ ജീവനക്കാരായ ഇവര്‍ സഞ്ചരിച്ചിരുന്ന വാന്‍ ട്രക്കുമായി കൂട്ടിയിടിക്കുകയായിരുന്നു.
നാട്ടിലേക്ക് വരാനുള്ള ഒരുക്കങ്ങള്‍ നടത്തുന്നതിനിടയിലാണ് രമീഷ് കുമാറിനെ മരണം കവര്‍ന്നത്. പേരാമ്പ്ര വിഷന്‍ ട്രസ്റ്റ് കണ്ണാശുപത്രിയിലെ ഒപ്റ്റോമെട്രിസ്റ്റായ ദൃശ്യ (ചീക്കിലോട്) ആണ് ഭാര്യ. അഞ്ചും രണ്ടും വയസ്സുള്ള രണ്ട് മക്കളുണ്ട്.
നിലവില്‍ മൃതദേഹങ്ങള്‍ ഷാര്‍ജ അല്‍ ഖാസിമി ആശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണ്. നിയമനടപടികള്‍ പൂര്‍ത്തിയാക്കി മൃതദേഹങ്ങള്‍ വേഗത്തില്‍ നാട്ടിലെത്തിക്കാനുള്ള ശ്രമങ്ങള്‍ പുരോഗമിക്കുന്നു.
Related News
