കൂട്ടിക്കട (കൊല്ലം): കൊല്ലം കോര്‍പറേഷന്റെയും മയ്യനാട് ഗ്രാമപഞ്ചായത്തിന്റെയും സംഗമസ്ഥലമായ കൂട്ടിക്കടയില്‍ റെയില്‍വേ മേല്‍പ്പാലം നിര്‍മിക്കണമെന്ന ദീര്‍ഘകാല ആവശ്യം ഉന്നയിച്ച് വിപുലമായ ആക്ഷന്‍ കൗണ്‍സില്‍ രൂപീകരിച്ചു. പ്രദേശത്തെ സാമൂഹിക പ്രവര്‍ത്തകരെയും പ്രദേശവാസികളെയും ഉള്‍പ്പെടുത്തിയാണ് കൗണ്‍സിലിന് രൂപം നല്‍കിയത്.
നാല് പ്രധാന റോഡുകളും ഉപറോഡും സംഗമിക്കുന്ന കവലയുടെ നടുവിലാണ് റെയില്‍വേ ഗേറ്റ് സ്ഥിതി ചെയ്യുന്നത്. ഇത് കാരണം പ്രദേശത്ത് ഗതാഗതക്കുരുക്ക് രൂക്ഷമാണ്. ദിവസേന ഇരുപാതകളിലുമായി ഇരുനൂറോളം തീവണ്ടികളാണ് ഇതിലൂടെ കടന്നുപോകുന്നത്. ഗേറ്റ് അടയ്ക്കാന്‍ വൈകുന്നതിനെ തുടര്‍ന്ന് പലപ്പോഴും തീവണ്ടികള്‍ കൂട്ടിക്കടയ്ക്ക് സമീപം നിര്‍ത്തിയിടേണ്ടി വന്നിട്ടുമുണ്ട്.
മുന്‍ സര്‍ക്കാര്‍ മേല്‍പ്പാല നിര്‍മാണത്തിനായി തുക വകയിരുത്തിയിരുന്നു. എന്നാല്‍ പിന്നീട് വന്ന ഭരണമാറ്റത്തോടെ പദ്ധതി തുക നിശ്ചലമാവുകയും സ്ഥലം ഏറ്റെടുപ്പ് നടപടികള്‍ മുടങ്ങുകയുമായിരുന്നുവെന്ന് കൗണ്‍സില്‍ യോഗത്തില്‍ പങ്കെടുത്തവര്‍ ചൂണ്ടിക്കാട്ടി. പദ്ധതി എത്രയും വേഗം യാഥാര്‍ഥ്യമാക്കാന്‍ ശക്തമായ സമരപരിപാടികള്‍ സംഘടിപ്പിക്കാന്‍ യോഗം തീരുമാനിച്ചു.
-ഇഖ്ബാല്‍ കൂട്ടിക്കട
