റിയാദ്: സൗദി അറേബ്യയിലെ മിക്ക പ്രദേശങ്ങളിലും ഇന്നു മുതല്‍ മഴ കനക്കുമെന്ന് ദേശീയ കാലാവസ്ഥാ നിരീക്ഷണ കേന്ദ്രം അറിയിച്ചു. മക്ക മേഖലയിലെ തീരദേശ ഭാഗങ്ങള്‍ ഉള്‍പ്പെടെയുള്ള പ്രദേശങ്ങളില്‍ വ്യത്യസ്ത അളവുകളില്‍ മഴ ലഭിക്കുമെന്നാണ് പ്രവചനം.
ശനിയാഴ്ച ജിദ്ദയിലും റാബിഗിലും മിതമായതോ ശക്തമായതോ ആയ മഴയ്ക്ക് സാധ്യതയുണ്ട്. തിങ്കള്‍, ചൊവ്വ ദിവസങ്ങളോടെ മഴ കൂടുതല്‍ ശക്തമാവുകയും രാജ്യത്തിന്റെ മറ്റ് മിക്ക ഭാഗങ്ങളിലേക്കും വ്യാപിക്കുകയും ചെയ്യുമെന്നാണ് കാലാവസ്ഥ പ്രവചനം വ്യക്തമാക്കുന്നത്. പൊതുജനങ്ങള്‍ ജാഗ്രത പാലിക്കണമെന്നും കാലാവസ്ഥാ കേന്ദ്രത്തിന്റെ മുന്നറിയിപ്പുകള്‍ കൃത്യമായി പിന്തുടരണമെന്നും അധികൃതര്‍ അഭ്യര്‍ത്ഥിച്ചു.
വെള്ളിയാഴ്ച മുതല്‍ ആരംഭിക്കുന്ന പുതിയ മഴക്കെടുതി നിരീക്ഷിക്കാന്‍ ആവശ്യമായ എല്ലാ തയ്യാറെടുപ്പുകളും പൂര്‍ത്തിയായതായി എന്‍സിഎം വക്താവ് ഹുസൈന്‍ അല്‍ ഖഹ്താനി വ്യക്തമാക്കി. ശനിയാഴ്ച മക്ക തീരപ്രദേശങ്ങളില്‍, പ്രത്യേകിച്ച് ജിദ്ദയിലും റാബിഗിലും മഴ കനക്കാനുള്ള സാധ്യതയെക്കുറിച്ചും അദ്ദേഹം ഓര്‍മ്മിപ്പിച്ചു.
ബന്ധപ്പെട്ട അധികൃതര്‍ നല്‍കുന്ന നിര്‍ദ്ദേശങ്ങള്‍ കര്‍ശനമായി പാലിക്കാനും, കനത്ത വെള്ളക്കെട്ടുകളുള്ള താഴ്വരകളും പുഴകളും മുറിച്ചുകടക്കുന്നതും അത്തരം പ്രദേശങ്ങളിലേക്ക് പോകുന്നതും പൂര്‍ണ്ണമായും ഒഴിവാക്കാനും പൊതുജനങ്ങളോട് അദ്ദേഹം ആവശ്യപ്പെട്ടു.
Related News
