റിയാദ്: സൗദി അറേബ്യയില്‍ ടാക്‌സി സര്‍വീസുകള്‍ക്കും പ്രൈവറ്റ് കാര്‍ റെന്റല്‍ ഏജന്‍സികള്‍ക്കും ഉപയോഗിക്കുന്ന വാഹനങ്ങളുടെ പ്രവര്‍ത്തന കാലാവധി ആറുമാസം കൂടി നീട്ടി നല്‍കിയതായി ജനറല്‍ ട്രാന്‍സ്പോര്‍ട്ട് അതോറിറ്റി (TGA) അറിയിച്ചു. ഇതോടെ ഇത്തരത്തിലുള്ള വാഹനങ്ങളുടെ കാലാവധി 2027 ജൂണ്‍ 30 വരെ ദീര്‍ഘിപ്പിച്ചു.
2026-ന്റെ അവസാനത്തോടെ അനുവദനീയമായ പ്രവര്‍ത്തന കാലാവധി പൂര്‍ത്തിയാകുന്ന വാഹനങ്ങള്‍ക്കാണ് ഈ ആനുകൂല്യം ലഭിക്കുക. കാലാവധി ദീര്‍ഘിപ്പിച്ചതോടെ ട്രാന്‍സ്പോര്‍ട്ട് സ്ഥാപനങ്ങള്‍ക്ക് ഈ വാഹനങ്ങള്‍ കൂടുതല്‍ കാലം ഉപയോഗിക്കാന്‍ സാധിക്കും.
വാഹനങ്ങള്‍ പെട്ടെന്ന് മാറ്റുന്നതിലൂടെയുള്ള സാമ്പത്തിക ഭാരം കുറയ്ക്കുക, സര്‍വീസുകള്‍ തടസ്സമില്ലാതെ ഉറപ്പാക്കുക, പ്രവര്‍ത്തനങ്ങളില്‍ കൂടുതല്‍ ഇളവുകള്‍ നല്‍കുക എന്നിവയാണ് ഈ തീരുമാനത്തിലൂടെ ലക്ഷ്യമിടുന്നതെന്ന് അതോറിറ്റി വ്യക്തമാക്കി. എന്നാല്‍ സുരക്ഷാ മാനദണ്ഡങ്ങളിലും സേവന നിലവാരത്തിലും യാതൊരു വിട്ടുവീഴ്ചയും ഉണ്ടാകില്ലെന്നും അധികൃതര്‍ അറിയിച്ചു.
നിലവിലുള്ള വാഹനങ്ങള്‍ പരമാവധി പ്രയോജനപ്പെടുത്തി സ്ഥാപനങ്ങള്‍ക്കുണ്ടാകുന്ന പ്രവര്‍ത്തനക്ഷമത വര്‍ദ്ധിപ്പിക്കാനും ഈ തീരുമാനം സഹായിക്കും. ഗതാഗത മേഖലയിലെ നിയമങ്ങള്‍ പരിഷ്‌കരിക്കുന്നതിന്റെയും സര്‍വീസുകളുടെ സുസ്ഥിരത ഉറപ്പുവരുത്തുന്നതിന്റെയും ഭാഗമായാണ് ഈ നടപടിയെന്ന് ജനറല്‍ ട്രാന്‍സ്പോര്‍ട്ട് അതോറിറ്റി കൂട്ടിച്ചേര്‍ത്തു.
Related News
