റിയാദ്: സമസ്ത കേരള ജംഇയ്യത്തുൽ ഉലമ വൈസ് പ്രസിഡന്റും ആത്മീയ നേതാവുമായിരുന്ന അമീനുശ്ശരീഅഃ സയ്യിദ് അലി ബാഫഖി തങ്ങളുടെ അനുസ്മരണവും പ്രാർത്ഥനാ സംഗമവും റിയാദ് ഐ.സി.എഫ്. സംഘടിപ്പിച്ചു. ബത്ഹ ഡി-പാലസ് ഓഡിറ്റോറിയത്തിൽ വെച്ച് നടന്ന പരിപാടിയിൽ ദാഈ ഷാഹിദ് അഹ്സനി അനുസ്മരണ പ്രഭാഷണം നടത്തി.
പ്രശസ്തമായ അഹ്‌ലുബൈത്ത് പരമ്പരയിലെ കണ്ണിയും ഉന്നത പാണ്ഡിത്യവും സമ്മേളിച്ച അപൂർവ വ്യക്തിത്വമായിരുന്നു സയ്യിദ് അലി ബാഫഖി തങ്ങളെന്ന് അദ്ദേഹം പറഞ്ഞു. ആറു പതിറ്റാണ്ടിലധികമായി കേരളത്തിലെ മത-സാമൂഹിക രംഗത്ത് നിറഞ്ഞുനിന്ന സൗമ്യ സാന്നിധ്യമായിരുന്നു തങ്ങൾ. ശാരീരിക അവശതകൾക്കിടയിലും നിരന്തര യാത്രകളിലൂടെ കേരളത്തിനകത്തും പുറത്തുമുള്ള വിശ്വാസികളിലേക്ക് ഇറങ്ങിച്ചെല്ലാൻ തങ്ങൾ ശ്രദ്ധിച്ചിരുന്നതായും അനുസ്മരണ പ്രഭാഷണത്തിൽ ചൂണ്ടിക്കാട്ടി.
പ്രാർത്ഥനയ്ക്ക് അബ്ദുൽ റഷീദ് ബാഖവി നേതൃത്വം നൽകി. ചടങ്ങിൽ ഇബ്രാഹിം കരീം, അബ്ദുൽ റഹ്‌മാൻ സഖാഫി, മജീദ് താനാളൂർ എന്നിവർ സംസാരിച്ചു.
