വാഷിങ്ടണ്‍: കാല്‍ നൂറ്റാണ്ട് വരെയെങ്കിലും പുനര്‍നിര്‍മിക്കാനാവാത്ത വിധത്തില്‍ ഇറാന്റെ ശേഷിക്കുന്ന ഭാഗങ്ങളും തകര്‍ക്കേണ്ടിവരുമെന്ന് അമേരിക്കന്‍ പ്രസിഡന്റ് ഡൊണാള്‍ഡ് ട്രംപ്. ഇതെക്കുറിച്ച് ഉടന്‍ ലോകം അറിയും എന്നും ട്രംപ് മുന്നറിയിപ്പ് നല്‍കി.
ഇറാനെ പൂര്‍ണമായി തകര്‍ക്കാന്‍ തനിക്ക് താല്‍പര്യമില്ലെന്നും എന്നാല്‍ ചിലപ്പോള്‍ അതിന് നിര്‍ബന്ധിതനായേക്കാമെന്നും ട്രംപ് പറഞ്ഞു. സംഘര്‍ഷം അവസാനിപ്പിക്കാന്‍ നയതന്ത്രശ്രമങ്ങള്‍ നടക്കുന്നതിനിടെയാണ് പുതിയ ഭീഷണി. സൈനികനടപടികള്‍ തുടരുമോ എന്ന കാര്യത്തില്‍ വാഷിങ്ടണിന്റെ നിലപാട് വ്യക്തമല്ല.
ട്രംപിന്റെ പ്രസ്താവനയെ അമേരിക്കന്‍ കോണ്‍ഗ്രസ് അംഗം യാസ്മിന്‍ അന്‍സാരി രൂക്ഷമായി പ്രതികരിച്ചു. ഒമ്പത് കോടി ജനങ്ങളുള്ള ഒരു രാജ്യത്തെ നശിപ്പിക്കുമെന്ന് വീണ്ടും ഭീഷണിപ്പെടുത്തുന്നത് മനുഷ്യത്വത്തിനെതിരായ കുറ്റമാണെന്ന് അവര്‍ എക്‌സില്‍ കുറിച്ചു.
ട്രംപിന്റെ 'അവിവേകപൂര്‍ണമായ യുദ്ധം' അവസാനിപ്പിക്കാന്‍ ഡെമോക്രാറ്റുകള്‍ അടിയന്തരമായി ഇടപെടണമെന്നും അവര്‍ ആവശ്യപ്പെട്ടു. ജനപ്രതിനിധിസഭയിലും സെനറ്റിലും ഡെമോക്രാറ്റുകള്‍ക്ക് വീണ്ടും ഭൂരിപക്ഷം ലഭിക്കുമ്പോള്‍ യുദ്ധം അവസാനിപ്പിക്കാന്‍ നടപടി സ്വീകരിക്കണമെന്നും 'ഇനി മതിയാക്കണം' എന്നും അന്‍സാരി പറഞ്ഞു.
2026ലെ ഇടക്കാല തിരഞ്ഞെടുപ്പില്‍ റിപ്പബ്ലിക്കന്‍ പാര്‍ട്ടിക്ക് തിരിച്ചടിയുണ്ടായതിനു പിന്നാലെയാണ് ട്രംപിന്റെ പുതിയ പ്രസ്താവന. തിരഞ്ഞെടുപ്പിനു ശേഷം യുദ്ധം അവസാനിക്കുമെന്ന് നേരത്തേ ട്രംപ് പ്രതീക്ഷ പ്രകടിപ്പിച്ചിരുന്നു. എന്നാല്‍ പുതിയ മുന്നറിയിപ്പ് സംഘര്‍ഷം കൂടുതല്‍ രൂക്ഷമാകാനുള്ള സാധ്യത നിലനില്‍ക്കുന്നുവെന്ന ആശങ്ക ഉയര്‍ത്തുന്നു.
ആണവ വിഷയത്തില്‍ പുതിയ നിര്‍ദേശം ഇറാന്‍ ഖത്തര്‍ മധ്യസ്ഥര്‍ വഴി അമേരിക്കയ്ക്ക് കൈമാറിയതായി റിപ്പോര്‍ട്ടുകളുണ്ട്. വാഷിങ്ടണ്‍ നിര്‍ദേശം പരിശോധിച്ചുവരികയാണെന്നും ഇറാന്‍ മുന്നോട്ടുവെച്ച ഏഴ് ആവശ്യങ്ങള്‍ അംഗീകരിക്കപ്പെടുന്നതിനായി ടെഹ്‌റാന്‍ കാത്തിരിക്കുകയാണെന്നുമാണ് വിവരം. നിര്‍ദേശത്തിന്റെ വിശദാംശങ്ങളോ ഏഴ് ആവശ്യങ്ങളുടെ ഉള്ളടക്കമോ സംബന്ധിച്ച് കൂടുതല്‍ വ്യക്തത പുറത്തുവന്നിട്ടില്ല.
അമേരിക്കയിലും ഇസ്രയേലിലും ആഭ്യന്തര വെല്ലുവിളികള്‍ വര്‍ധിക്കുകയാണെന്നും പശ്ചിമേഷ്യയെ മാറ്റിമറിക്കാനുള്ള അവരുടെ ശ്രമങ്ങള്‍ തിരിച്ചടിയായെന്നും ഇറാന്റെ ബസിജ് കമാന്‍ഡര്‍ ഹുസൈന്‍ ത്വയ്യിബ് അവകാശപ്പെട്ടു.
ടെഹ്‌റാനില്‍ നടന്ന 19ാമത് അന്താരാഷ്ട്ര റെസിസ്റ്റന്‍സ് ഫിലിം ഫെസ്റ്റിവലിന്റെ സമാപനച്ചടങ്ങില്‍ സംസാരിക്കുകയായിരുന്നു അദ്ദേഹം. മേഖലയിലെ രാഷ്ട്രീയ, സാമ്പത്തിക, സാമൂഹിക സാഹചര്യങ്ങള്‍ മാറ്റാനാണ് വാഷിങ്ടണ്‍ ശ്രമിച്ചതെന്നും എന്നാല്‍ അതിന്റെ പ്രത്യാഘാതങ്ങള്‍ അമേരിക്കയ്ക്കുള്ളില്‍ത്തന്നെ പ്രകടമാകുകയാണെന്നും തയേബ് പറഞ്ഞു.
യുദ്ധത്തിനും സാധാരണക്കാര്‍ക്കെതിരായ ആക്രമണങ്ങള്‍ക്കുമെതിരെ അമേരിക്കന്‍ വിദ്യാര്‍ഥികള്‍, അധ്യാപകര്‍, കലാകാരന്മാര്‍ എന്നിവര്‍ നടത്തുന്ന പ്രതിഷേധങ്ങള്‍ അദ്ദേഹം ചൂണ്ടിക്കാട്ടി. വിദേശരാജ്യങ്ങളിലെ സൈനിക ഇടപെടലുകള്‍ക്കായി ചെലവഴിക്കുന്ന തുകയെക്കുറിച്ചും യുദ്ധത്തിന്റെ ആവശ്യകതയെക്കുറിച്ചും അമേരിക്കക്കാര്‍ക്കിടയില്‍ ചോദ്യങ്ങള്‍ ഉയരുന്നുണ്ടെന്നും ത്വയ്യിബ് പറഞ്ഞു.
Related News
