ജിദ്ദ: പ്രമുഖ മുസ്ലിം ടെക്നോളജി ബ്രാന്‍ഡായ ഐ-കിബ്ല, ജിദ്ദ സൂപ്പര്‍ഡോമില്‍ നടക്കുന്ന ആറാമത് ഹജ്ജ് എക്സിബിഷനില്‍ പുതിയ സ്മാര്‍ട്ട് ഉപകരണ നിര പുറത്തിറക്കി. തീര്‍ത്ഥാടകരുടെ സുരക്ഷയ്ക്കും തവാഫ്, സഅ്‌യ് തുടങ്ങിയ കര്‍മ്മങ്ങള്‍ എളുപ്പത്തില്‍ നിര്‍വ്വഹിക്കുന്നതിനുമായി 'ഹജ്ജ്ബാന്‍ഡ് 2' , സ്മാര്‍ട്ട് റിസ്റ്റ് ബാന്‍ഡ്, 'മക്ക മെമ്മോ' ഡിജിറ്റല്‍ കാര്‍ഡ്, 'ദിക്ര്‍ സ്മാര്‍ട്ട് റിംഗ്' എന്നിവയാണ് പ്രദര്‍ശനത്തിനെത്തിച്ചിരിക്കുന്നത്.

സൗദി ഹജ്ജ് ഉംറ മന്ത്രാലയത്തിന്റെ നേതൃത്വത്തില്‍ നവംബര്‍ 8 മുതല്‍ 11 വരെ നടക്കുന്ന എക്സിബിഷനില്‍ 'വിശ്വാസവും സാങ്കേതികവിദ്യയും സമന്വയിപ്പിച്ചുള്ള' ഉല്‍പന്നങ്ങളാണ് ഐ-കിബ്ള അവതരിപ്പിച്ചിരിക്കുന്നത്.

ഹജ്ജ്ബാന്‍ഡ് 2: തീര്‍ത്ഥാടകരുടെ ആരോഗ്യനില നിരന്തരം നിരീക്ഷിക്കാനും, തവാഫ്-സഈ ചുറ്റലുകള്‍ കൃത്യമായി സ്വയം എണ്ണാനും, തമ്പുകളിലേക്ക് തിരികെയെത്താനുള്ള വഴികാട്ടാനും ഈ സ്മാര്‍ട്ട് റിസ്റ്റ് ബാന്‍ഡിന് സാധിക്കും. ഇതിന്റെ ബാറ്ററി ഒറ്റ ചാര്‍ജില്‍ 7 ദിവസം വരെ നീണ്ടുനില്‍ക്കും.

മക്ക മെമ്മോ: തീര്‍ത്ഥാടകരുടെ വ്യക്തിഗത വിവരങ്ങളും ഗ്രൂപ്പ് വിവരങ്ങളും സൂക്ഷിക്കുന്നതിനൊപ്പം ഹജ്ജ് കര്‍മ്മങ്ങളുടെ ഗൈഡായും ഓര്‍മ്മക്കുറിപ്പായും ഉപയോഗിക്കാവുന്ന ഡിജിറ്റല്‍ കാര്‍ഡാണിത്.

ദിക്ര്‍ സ്മാര്‍ട്ട് റിംഗ്: ഖിബ്ല ദിശ കൃത്യമായി കാണിക്കുന്ന ആദ്യ സ്മാര്‍ട്ട് മോതിരമായ 'ജൂദ് 3' ഉള്‍പ്പെടെയുള്ളവയാണ് ഇതില്‍ പ്രധാനപ്പെട്ടവ. തസ്ബീഹ് എണ്ണാനും നമസ്‌കാര സമയങ്ങള്‍ ഓര്‍മ്മിപ്പിക്കാനും ഇത് സഹായിക്കും.

വിഷന്‍ 2030-ന്റെ ഭാഗമായി പ്രതിവര്‍ഷം മൂന്ന് കോടി ഉംറ തീര്‍ത്ഥാടകരെ ലക്ഷ്യമിടുന്ന സൗദി അറേബ്യയില്‍, തീര്‍ത്ഥാടകരുടെ സേവനം കൂടുതല്‍ ഡിജിറ്റലാക്കുന്നതിന്റെ ഭാഗമായാണ് ഐ-കിബ്ല ഇത്തരം സാങ്കേതികവിദ്യകള്‍ അവതരിപ്പിക്കുന്നത്. ജിദ്ദ സൂപ്പര്‍ഡോമിലെ ഹാള്‍ 2-ല്‍ പൊതുജനങ്ങള്‍ക്കായി ഇവ പ്രദര്‍ശിപ്പിച്ചിട്ടുണ്ട്.