ജിദ്ദ: 'മക്കയില്‍ നിന്ന് ലോകത്തിലേക്ക്' എന്ന പ്രമേയത്തില്‍ സൗദി ഹജ്ജ്-ഉംറ മന്ത്രാലയത്തിന്റെ നേതൃത്വത്തില്‍ സംഘടിപ്പിക്കുന്ന ആറാം പതിപ്പ് ഹജ്ജ് കോണ്‍ഫറന്‍സ് & എക്സിബിഷന് (ഹജ്ജ് കോണ്‍ഫെക്സ് 2026) ജിദ്ദ സൂപ്പര്‍ഡോമില്‍ ഉജ്ജ്വല തുടക്കമായി. സല്‍മാന്‍ രാജാവിന്റെ പ്രത്യേക രക്ഷാകര്‍തൃത്വത്തില്‍ നടക്കുന്ന മേള നവംബര്‍ 8 മുതല്‍ 11 വരെയാണ് സംഘടിപ്പിച്ചിരിക്കുന്നത്.

അല്ലാഹുവിന്റെ അതിഥികളായെത്തുന്ന തീര്‍ത്ഥാടകര്‍ക്കുള്ള സേവനങ്ങളുടെ നിലവാരം ഉയര്‍ത്തുന്നതും ഡിജിറ്റല്‍ സാങ്കേതികവിദ്യയുടെ സാധ്യതകള്‍ പൂര്‍ണ്ണമായി പ്രയോജനപ്പെടുത്തുന്നതുമായ വിവിധ വിഷയങ്ങളിലാണ് ഉദ്ഘാടന ദിനമായ നവംബര്‍ 8 ഞായറാഴ്ച പ്രമുഖ വിദഗ്ധരും നയതന്ത്രജ്ഞരും പങ്കെടുത്ത ശില്‍പ്പശാലകള്‍ നടന്നത്.

'തീർത്ഥാടകരുടെ സുരക്ഷയും ആശ്വാസവും ഉറപ്പാക്കൽ: സേവന ലളിതവൽക്കരണം, ബോധവൽക്കരണം, പ്രതിസന്ധി നിർവ്വഹണം', മക്കയുടെ സ്സെന്റ് ഐഡന്റിറ്റി: തീർത്ഥാടകരുടെ അനുഭവേദ്യമായ ഒരു പുതിയ തലമുറ', 'ഹജ്ജ്-ഉംറ പ്രവർത്തന സംവിധാനങ്ങളിലെ സ്ഥാപനപരവും പ്രവർത്തനപരവുമായ മികവ്', 'ഹജ്ജ്: ഒരു അസാധാരണ യാത്ര' 'തീർത്ഥാടകരുടെ ഡിജിറ്റൽ യാത്ര' 'തീർത്ഥാടകരുടെ സുരക്ഷിതമായ ഡിജിറ്റൽ യാത്ര'
'ഹജ്ജ്-ഉംറ മേഖലയിലെ സംരംഭകത്വം: അവസരങ്ങളും വെല്ലുവിളികളും' തുടങ്ങിയ വിഷയങ്ങളിൽ ശിൽപശാലകളും അവതരണങ്ങളും നടന്നു.

സൗദി വിഷന്‍ 2030 ലക്ഷ്യമിടുന്ന രീതിയില്‍ തീര്‍ത്ഥാടകര്‍ക്കുള്ള സേവനങ്ങള്‍ കൂടുതല്‍ സുഗമവും സുരക്ഷിതവുമാക്കുന്നതിനായി 150-ലധികം രാജ്യങ്ങളില്‍ നിന്നുള്ള പ്രതിനിധികളും 500-ലധികം സ്ഥാപനങ്ങളുമാണ് നാല് ദിവസം നീണ്ടുനില്‍ക്കുന്ന ഈ അന്താരാഷ്ട്ര സമ്മേളനത്തില്‍ പങ്കെടുക്കുന്നത്.