ന്യൂഡല്ഹി: ട്രെയിന് യാത്രക്കാരില് ഏറെക്കാലമായി ചര്ച്ചയായ റിസര്വേഷന് എഗെയ്ന്സ്റ്റ് കാന്സലേഷന് (ആര്.എ.സി) ടിക്കറ്റ് സംവിധാനത്തില് മാറ്റം വരുത്താനൊരുങ്ങി ഇന്ത്യന് റെയില്വേ. മുഴുവന് ടിക്കറ്റ് നിരക്കും ഈടാക്കിയിട്ടും യാത്രക്കാര്ക്ക് പൂര്ണമായി ബെര്ത്ത് ലഭിക്കാത്ത നിലവിലെ രീതിയില് മാറ്റം വേണമെന്ന ആവശ്യം ശക്തമായതോടെയാണ് റെയില്വേയുടെ പുനഃപരിശോധന.
ആര്.എ.സി ടിക്കറ്റുള്ളവര്ക്ക് വെയിറ്റിങ് ലിസ്റ്റിലുള്ളവരെപ്പോലെ യാത്ര നിഷേധിക്കപ്പെടില്ല. എന്നാല് ചാര്ട്ട് തയ്യാറാക്കിയ ശേഷവും ആര്.എ.സി നിലയില് തുടരുന്നവര്ക്ക് പലപ്പോഴും ഒരു ബെര്ത്ത് മറ്റൊരു യാത്രക്കാരനുമായി പങ്കിടേണ്ടിവരും. ഒരേ ബെര്ത്തില് രണ്ടുപേര്ക്ക് യാത്ര ചെയ്യേണ്ടിവരുന്ന ഈ രീതി ദീര്ഘദൂര, രാത്രികാല യാത്രകളില് വലിയ അസൗകര്യമാണ് സൃഷ്ടിക്കുന്നത്. മുഴുവന് നിരക്കും നല്കിയിട്ടും മര്യാദക്ക് ഇരിക്കാനോ ഉറങ്ങാനോ സാധിക്കുന്നില്ലെന്നാണ് പ്രധാന പരാതി.
ആര്.എ.സി സംവിധാനം പൂര്ണമായി ഒഴിവാക്കണോ അതോ പുനഃസംഘടിപ്പിക്കണോ എന്ന കാര്യമാണ് റെയില്വേ പരിശോധിക്കുന്നത്. മുഴുവന് ബെര്ത്ത് ലഭിക്കാത്ത സാഹചര്യത്തില് മുഴുവന് നിരക്കും ഈടാക്കുന്നത് ഉചിതമല്ലെന്ന അഭിപ്രായമാണ് ഉയരുന്നത്.
രണ്ടു അപരിചിതരായ യാത്രക്കാര് ഒരേ ബെര്ത്ത് പങ്കിടേണ്ടിവരുന്നതും ഒഴിവുള്ള ബെര്ത്ത് ലഭ്യമല്ലാത്തപ്പോള് ടിക്കറ്റ് പരിശോധകരും യാത്രക്കാരും നേരിടുന്ന പ്രയാസങ്ങളും നിലവിലെ സംവിധാനത്തിന്റെ പോരായ്മകളായി ചൂണ്ടിക്കാണിക്കപ്പെടുന്നു.
2026 ഫെബ്രുവരിയില് പാര്ലമെന്റിന്റെ പബ്ലിക് അക്കൗണ്ട്സ് കമ്മിറ്റി (പി.എ.സി) സമര്പ്പിച്ച റിപ്പോര്ട്ടിലും ആര്.എ.സി നിരക്കിനെക്കുറിച്ച് വിമര്ശനമുയര്ന്നിരുന്നു. ചാര്ട്ട് തയ്യാറാക്കിയ ശേഷവും ആര്.എ.സി വിഭാഗത്തില് തുടരുകയും പൂര്ണമായ ബെര്ത്ത് ലഭിക്കാതിരിക്കുകയും ചെയ്യുന്ന യാത്രക്കാരില്നിന്ന് മുഴുവന് നിരക്കും ഈടാക്കുന്നത് ന്യായീകരിക്കാനാവില്ലെന്ന് സമിതി നിരീക്ഷിച്ചു.
പൂര്ണ ബെര്ത്ത് ലഭിക്കാത്ത യാത്രക്കാര്ക്ക് ടിക്കറ്റ് നിരക്കിന്റെ ഒരു ഭാഗം തിരിച്ചുനല്കുന്നതിനുള്ള സംവിധാനം ഏര്പ്പെടുത്തണമെന്ന് സമിതി റെയില്വേ മന്ത്രാലയത്തോട് നിര്ദേശിക്കുകയും ചെയ്തു.
ആര്.എ.സി സംവിധാനം ഒഴിവാക്കുന്നതിനെക്കുറിച്ചോ ഭാഗിക നിരക്ക് തിരിച്ചുനല്കുന്നതിനെക്കുറിച്ചോ അന്തിമ തീരുമാനമോ ഔദ്യോഗിക ഉത്തരവോ പ്രഖ്യാപിച്ചിട്ടില്ല. മാറ്റം നടപ്പായാല് ആര്.എ.സി ടിക്കറ്റില് യാത്ര ചെയ്യുന്ന ലക്ഷക്കണക്കിന് യാത്രക്കാര്ക്ക് ആശ്വാസമാകുമെന്നാണ് പ്രതീക്ഷ.
Related News