റിയാദ്: സ്ത്രീകളെ പിന്തുടര്ന്ന് ആക്രമിക്കുകയും, ലൈംഗികാതിക്രമം നടത്തുകയും, കവര്ച്ചയും മയക്കുമരുന്ന് ഉപയോഗവും നടത്തുകയും ചെയ്ത പ്രതിക്ക് സൗദി ആഭ്യന്തര മന്ത്രാലയം തിങ്കളാഴ്ച വധശിക്ഷ നടപ്പാക്കി. മൊറോക്കന് പൗരനായ തലാല് ബിന് അഹമ്മദ് ബിന് മുഹമ്മദ് അല് മജ്ദൂഅ എന്നയാള്ക്കെതിരെയാണ് ശിക്ഷ നടപ്പാക്കിയതെന്ന് മന്ത്രാലയം പുറത്തിറക്കിയ ഔദ്യോഗിക പ്രസ്താവനയില് വ്യക്തമാക്കി.
പ്രതി നിരവധി സ്ത്രീകളെ ആസൂത്രിതമായി പിന്തുടരുകയും പതിയിരുന്ന് ആക്രമിക്കുകയും ചെയ്തിരുന്നു. പൊതുസ്ഥലത്തുവെച്ച് ക്രൂരമായി മര്ദ്ദിച്ചും ബലപ്രയോഗത്തിലൂടെ കീഴ്പ്പെടുത്തിയും സ്ത്രീകളുടെ അഭിമാനത്തിന് ക്ഷതമേല്പ്പിക്കാനും വസ്ത്രങ്ങള് വലിച്ചുകീറാനും ഇയാള് ശ്രമിച്ചു. ഒരു സ്ത്രീയെ ബലപ്രയോഗത്തിലൂടെ പീഡിപ്പിച്ച ശേഷം അവരുടെ കൈവശമുണ്ടായിരുന്ന പണവും വിലപിടിപ്പുള്ള വസ്തുക്കളും ഇയാള് കവര്ച്ച ചെയ്തു. മറ്റൊരു സ്ത്രീയെയും പൊതുസ്ഥലത്തുവെച്ച് സമാനമായ രീതിയില് പീഡിപ്പിക്കാനും അവരുടെ പക്കലുള്ള വസ്തുക്കള് കവരാനും ഇയാള് ശ്രമിച്ചിരുന്നു. കൂടാതെ, നിരോധിത ലഹരിവസ്തുക്കള് ഇയാള് ഉപയോഗിച്ചിരുന്നതായും അന്വേഷണത്തില് തെളിഞ്ഞു.
സുരക്ഷാ സേന പ്രതിയെ പിടികൂടുകയും വിശദമായ അന്വേഷണത്തിനൊടുവില് കുറ്റപത്രം സമര്പ്പിക്കുകയും ചെയ്തു. ബന്ധപ്പെട്ട കോടതിയില് നടന്ന വിചാരണയില് പ്രതിയുടെ കുറ്റകൃത്യങ്ങളും ഉത്തരവാദിത്തവും സംശയാതീതമായി തെളിയിക്കപ്പെട്ടതിനെത്തുടര്ന്ന് വധശിക്ഷ വിധിക്കുകയായിരുന്നു. അപ്പീല് കോടതിയും പിന്നീട് സുപ്രീം കോടതിയും ഈ വിധി ശരിവെച്ചതോടെ, ശരീഅത്ത് നിയമപ്രകാരമുള്ള ശിക്ഷ നടപ്പാക്കാന് രാജകീയ ഉത്തരവ് പുറപ്പെടുവിക്കുകയായിരുന്നു.
Related News