ജിദ്ദ: സായാഹ്നങ്ങളില് കാലാവസ്ഥ കൂടുതല് സുഖകരമായതോടെ സൂര്യാസ്തമയ കാഴ്ചകളും കടല്ത്തീരത്തെ കുളിര്മ്മയും ആസ്വദിക്കാന് ജിദ്ദയിലെ സ്വദേശികളും വിദേശികളുമായ താമസക്കാരും സന്ദര്ശകരും കോര്ണിഷിലേക്കും വാട്ടര്ഫ്രണ്ടിലേക്കും പ്രാദേശിക പാര്ക്കുകളിലേക്കും ഒഴുകുന്നു. ചെങ്കടലിന്റെ ചക്രവാളത്തില് സൂര്യന് അസ്തമിക്കുന്ന മനോഹര ദൃശ്യം കാണുന്നതിനായി നിരവധി ആളുകളാണ് കോര്ണിഷില് ഒത്തുചേരുന്നത്. കുടുംബങ്ങള് പുല്ത്തകിടികളിലും കടലിന് അഭിമുഖമായുള്ള ഇരിപ്പിടങ്ങളിലും ഒത്തുകൂടി തിരമാലകളുടെ ശബ്ദത്തിനൊപ്പം സൗഹൃദ സംഭാഷണങ്ങളില് ഏര്പ്പെടുകയും രാത്രി വൈകുവോളം സമയം ചെലവഴിക്കുകയും ചെയ്യുന്നു.
വാട്ടര്ഫ്രണ്ടിന് പുറമെ നഗരത്തിലെ വിവിധ താമസമേഖലകളിലുള്ള പാര്ക്കുകളും വൈകുന്നേരങ്ങളില് സജീവമാണ്. വീടുകള്ക്ക് സമീപം തന്നെ ഉല്ലാസത്തിനായി എത്തുന്ന കുടുംബങ്ങള്ക്കും, തുറസ്സായ സ്ഥലങ്ങളില് കളിക്കാന് എത്തുന്ന കുട്ടികള്ക്കും, ദിവസേനയുള്ള നടത്തത്തിനായി നടപ്പാതകള് ഉപയോഗിക്കുന്നവര്ക്കും ഈ പാര്ക്കുകള് വലിയ ആശ്വാസമാണ് നല്കുന്നത്.
സന്ദര്ശകരുടെ തിരക്ക് വര്ദ്ധിച്ച സാഹചര്യത്തില്, നഗരത്തിലെ പാര്ക്കുകളും വാട്ടര്ഫ്രണ്ടുകളും സജ്ജമാക്കുന്നതിനായി ജിദ്ദ ഗവര്ണറേറ്റ് സെക്രട്ടേറിയറ്റ് (അമാന) പ്രത്യേക കര്മ്മപദ്ധതി നടപ്പിലാക്കിയിട്ടുണ്ട്. ഇതിന്റെ ഭാഗമായി പൊതുസ്ഥലങ്ങളിലെ ശുചീകരണ പ്രവര്ത്തനങ്ങള് ഊര്ജ്ജിതമാക്കുകയും, തുടര്ച്ചയായ ഫീല്ഡ് നിരീക്ഷണവും അണുനശീകരണ പ്രവര്ത്തനങ്ങളും ശക്തമാക്കുകയും ചെയ്തിട്ടുണ്ടെന്ന് അധികൃതര് വ്യക്തമാക്കി.