മലപ്പുറം: ജനനി വന്ധ്യതാ നിവാരണ പദ്ധതിയിലൂടെ മലപ്പുറം ജില്ലയില് 200 കുഞ്ഞുങ്ങള് ജനിച്ചതിന്റെ സന്തോഷം പങ്കുവെച്ച് സംഘടിപ്പിച്ച രണ്ടാമത് '100 കുരുന്നുകളുടെ സ്നേഹസംഗമം' ശ്രദ്ധേയമായി. സംസ്ഥാന ആയുഷ് ഹോമിയോപ്പതി വകുപ്പ്, നാഷണല് ആയുഷ് മിഷന്, ജില്ലാ പഞ്ചായത്ത് എന്നിവയുടെ സംയുക്താഭിമുഖ്യത്തില് മലപ്പുറം കുന്നുമ്മല് (കാട്ടുങ്ങല്) റീജന്സി കണ്വെന്ഷന് സെന്ററില് നടന്ന പരിപാടി വ്യവസായ-ഐ.ടി. വകുപ്പ് മന്ത്രി പി.കെ. കുഞ്ഞാലിക്കുട്ടി ഉദ്ഘാടനം ചെയ്തു. റവന്യൂ-ഭവനനിര്മാണ വകുപ്പ് മന്ത്രി എ.പി. അനില്കുമാര് മുഖ്യാതിഥിയായി.
ജില്ലാ പഞ്ചായത്ത് പ്രസിഡന്റ് പി.എ. ജബ്ബാര് ഹാജി അധ്യക്ഷനായി. പരിപാടിയുടെ ഭാഗമായി പുറത്തിറക്കിയ സുവനീര് മലപ്പുറം നഗരസഭാ ചെയര്പേഴ്സണ് അഡ്വ. വി. റിനിഷ പ്രകാശനം ചെയ്തു.
മുണ്ടുപറമ്പ് ജില്ലാ ഹോമിയോ ആശുപത്രി കേന്ദ്രീകരിച്ച് പ്രവര്ത്തിക്കുന്ന ജനനി പദ്ധതിയിലൂടെ 2022-ല് ആദ്യ നൂറ് കുഞ്ഞുങ്ങള് ജനിച്ചതിന്റെ ഭാഗമായി ആദ്യ സ്നേഹസംഗമം സംഘടിപ്പിച്ചിരുന്നു. തുടര്ന്ന് നൂറ് ദമ്പതികള്ക്ക് കൂടി സന്താനഭാഗ്യം ലഭിച്ചതോടെയാണ് രണ്ടാമത്തെ സംഗമം ഒരുക്കിയത്.
ജില്ലാ ഹോമിയോ മെഡിക്കല് ഓഫീസര് ഡോ. പി. സുമേഷ്, ജനനി ജില്ലാ കണ്വീനര് ഡോ. എസ്. മഞ്ജു, ജില്ലാ പഞ്ചായത്ത് സ്ഥിരംസമിതി ചെയര്മാന് പി.കെ. അസ്ലു, നാഷണല് ആയുഷ് മിഷന് ജില്ലാ പ്രോഗ്രാം മാനേജര് ഡോ. പി. സനല്, ഡോ. സി. അലിഗര് ബാബു, ഷാജിത ആറ്റാശ്ശേരി, കെ.എസ്. ഹസ്കര്, എച്ച്.എം.സി. അംഗങ്ങള്, വിവിധ ജനപ്രതിനിധികള്, ആരോഗ്യവകുപ്പ് ഉദ്യോഗസ്ഥര് തുടങ്ങിയവര് പങ്കെടുത്തു.