ന്യൂഡല്ഹി: ഹോര്മുസ് കടലിടുക്കില് ഇന്ത്യന് നാവികര് സഞ്ചരിച്ചിരുന്ന എല്.പി.ജി ടാങ്കര് കപ്പലിന് നേരെ തിങ്കളാഴ്ച മിസൈല് ആക്രമണമുണ്ടായി. പനാമ പതാകയുള്ള 'താര ഗ്യാസ്' എന്ന കപ്പലിന് നേരെയാണ് ആക്രമണമുണ്ടായതെന്ന് കേന്ദ്ര തുറമുഖ-ഷിപ്പിംഗ്-ജലഗതാഗത മന്ത്രി സര്ബാനന്ദ സോനോവാള് അറിയിച്ചു. കപ്പലിലുണ്ടായിരുന്ന 24 ഇന്ത്യന് നാവികരുള്പ്പെടെ ആകെ 25 ജീവനക്കാരും പൂര്ണ്ണമായും സുരക്ഷിതരാണെന്നും ആര്ക്കും പരിക്കുകളില്ലെന്നും അദ്ദേഹം വ്യക്തമാക്കി.
സ്ഥിതിഗതികള് നിരന്തരം നിരീക്ഷിച്ചുവരികയാണെന്നും ഇന്ത്യന് നാവികരുടെ സുരക്ഷയും ക്ഷേമവും ഉറപ്പുവരുത്തുന്നതിനായി കപ്പല് മാനേജ്മെന്റ് കമ്പനിയുമായി അടുത്ത സമ്പര്ക്കം പുലര്ത്തുന്നുണ്ടെന്നും സര്ബാനന്ദ സോനോവാള് സമൂഹമാധ്യമമായ എക്സിലൂടെ അറിയിച്ചു. ഒരാഴ്ചക്കിടെ ഇത് രണ്ടാം തവണയാണ് ഇന്ത്യന് നാവികര് സഞ്ചരിക്കുന്ന കപ്പലിന് നേരെ മേഖലയില് ആക്രമണമുണ്ടാകുന്നത്.
നേരത്തെ നവംബര് 11-ന് മിന സാഖറിന് സമീപം നങ്കൂരമിട്ടിരുന്ന ലൈബീരിയന് പതാകയുള്ള 'എം.ടി ഡൊമിനിക്ക പ്രോസ്പെരിറ്റി' എന്ന ക്രൂഡ് ഓയില് ടാങ്കറിന് നേരെയും ആക്രമണമുണ്ടായിരുന്നു. അന്ന് കപ്പലിലുണ്ടായിരുന്ന 19 ഇന്ത്യന് നാവികരുള്പ്പെടെ 22 ജീവനക്കാരെയും യു.എ.ഇ കോസ്റ്റ് ഗാര്ഡ് സുരക്ഷിതമായി ഒഴിപ്പിച്ചിരുന്നു. ഇറാനും അമേരിക്ക-ഇസ്രായേല് സഖ്യവും തമ്മിലുള്ള സംഘര്ഷം രൂക്ഷമായതോടെ ഗള്ഫ് മേഖലയിലും ഹോര്മുസ് കടലിടുക്കിലും ചരക്കുകപ്പലുകള്ക്ക് നേരെയുള്ള ആക്രമണങ്ങള് വര്ദ്ധിച്ചുവരികയാണ്. ലോകത്തെ അസംസ്കൃത എണ്ണയുടെ അഞ്ചിലൊന്ന് ഭാഗവും കടന്നുപോയിരുന്ന തന്ത്രപ്രധാനമായ ജലപാതയാണ് ഹോര്മുസ് കടലിടുക്ക്.
Related News