ന്യൂഡല്ഹി: തന്റെ മാതാവ് സോണിയ ഗാന്ധി ഭക്ഷണസമയത്ത് ചിലപ്പോഴൊക്കെ പിതാവ് രാജീവ് ഗാന്ധിയുടെ മടിയിലിരിക്കുമായിരുന്നു എന്ന പരാമര്ശത്തെത്തുടര്ന്നുണ്ടായ വിമര്ശനങ്ങള്ക്ക് മറുപടിയുമായി ലോക്സഭാ പ്രതിപക്ഷ നേതാവും കോണ്ഗ്രസ് നേതാവുമായ രാഹുല് ഗാന്ധി രംഗത്തെത്തി. ഭയവും കോപവും വെറുപ്പും ബി.ജെ.പി, ആര്.എസ്.എസ് അനുഭാവികളുടെ ഹൃദയങ്ങള്ക്ക് ചുറ്റും ഒരു വല നെയ്തിരിക്കുകയാണെന്നും, അത് സ്നേഹം അനുഭവിക്കുന്നതില് നിന്നും പ്രകടിപ്പിക്കുന്നതില് നിന്നും അവരെ തടയുന്നുവെന്നും രാഹുല് ഗാന്ധി ചൊവ്വാഴ്ച സമൂഹമാധ്യമമായ എക്സിലൂടെ പ്രതികരിച്ചു.
ഒരു യഥാര്ത്ഥ ഹിന്ദു എന്ന നിലയില് അവരെ ഈ വെറുപ്പിന്റെ വലയില് നിന്ന് മോചിപ്പിക്കേണ്ടത് തന്റെ കടമയാണെന്നും, അതുവഴി അവര്ക്കും ജീവിതത്തില് സ്നേഹത്തിന്റെയും പരസ്പര ബന്ധത്തിന്റെയും മനോഹാരിതയും ആനന്ദവും അനുഭവിക്കാന് സാധിക്കുമെന്നും അദ്ദേഹം കുറിച്ചു. 'സത്യം ശിവം സുന്ദരം' എന്ന് കുറിച്ചുകൊണ്ടാണ് രാഹുല് ഗാന്ധി തന്റെ കുറിപ്പ് അവസാനിപ്പിച്ചത്.
കുറിപ്പിനൊപ്പം ശിവന്റെ വാഹനമായ നന്ദിയുടെ പുറത്ത് ശിവനും പാര്വ്വതിയും ഒരുമിച്ചിരിക്കുന്ന പുരാതന ക്ഷേത്ര ശില്പത്തിന്റെ ചിത്രവും രാഹുല് ഗാന്ധി പങ്കുവെച്ചിട്ടുണ്ട്. ദൈവിക ദമ്പതികള്ക്കിടയിലുള്ള ആര്ദ്രതയും സ്നേഹവും ആഴത്തിലുള്ള ആത്മബന്ധവും പ്രതിഫലിപ്പിക്കുന്നതാണ് ഈ ശില്പം. സോണിയാ ഗാന്ധിയെയും രാജീവ് ഗാന്ധിയെയും കുറിച്ചുള്ള രാഹുല് ഗാന്ധിയുടെ മുന്പത്തെ പ്രസ്താവനയ്ക്കെതിരെ വിവിധ കോണുകളില് നിന്ന് വിമര്ശനങ്ങള് ഉയര്ന്ന പശ്ചാത്തലത്തിലാണ് അദ്ദേഹത്തിന്റെ ഈ പുതിയ പ്രതികരണം.